Laýazymdy qyzmetkerlerimizdiń uıymdasqan qylmystyq topqa qatysy joq - Qorǵanys mınıstrligi
«Qazaqstan Respýblıkasynyń Sybaılas jemqorlyqqa qarsy is-qımyl agenttigi júrgizgen sotqa deıingi tergep-tekserý nátıjeleri boıynsha Qorǵanys mınıstrliginiń laýazymdy adamdarynyń uıymdasqan qylmystyq topqa qatysy joq ekeni anyqtalǵanyn málimdeımiz.
Qazir qylmystyq jaýapkershilikke tartylǵan laýazymdy tulǵalardyń quqyqqa qaıshy áreketteriniń saldarynan «Áskerı qurylys» AQ-nyń qarjylyq jaǵdaıy aıtarlyqtaı tómendedi, osyǵan baılanysty kredıtorlyq bereshegi boldy.
Kez kelgen sybaılas jemqorlyq faktilerin boldyrmaý maqsatynda Qorǵanys mınıstrligi birqatar qatań shara qabyldady. Atap aıtsaq, «Áskerı qurylys» AQ basshylyǵy tolyq aýystyryldy, jalpy vedomstvolyq baǵynysty uıymnyń qyzmetine baqylaý kúsheıtildi.
Bul zańsyz áreketterdi 2019-2020 jyldar aralyǵynda aktsıonerlik qoǵamnyń laýazymdy tulǵalary jasaǵanyn aıta ketý kerek.
Barlyq zańbuzýshylyqtar boıynsha jedel aqparattandyrý men tergeý is-sharalary sybaılas jemqorlyq qylmystarmen kúres jónindegi baǵdarlamany iske asyrý aıasynda QR Qorǵanys mınıstrliginiń qazirgi basshylyǵynyń bastamasymen qolǵa alyndy.
2022 jyldyń basynan bastap «Áskerı qurylys» AQ qyzmetin reformalaý jáne kredıtorlyq bereshekti óteý jumystary júrgizilip jatyr.
Búgingi tańda 100-den asa kompanııa medıatıvtik kelisimderge qol qoıdy.
Kásipkerler aldyndaǵy kredıtorlyq bereshektiń negizgi bóligin 2023 jyldyń sońyna deıin mindetti túrde óteý josparlanyp otyr», - delingen resmı málimdemede.
Buǵan deıin habarlaǵanymyzdaı, «Áskerı qurylys» AQ basshysy týysqandarymen birge 596 mln teńge jymqyrdy dep aıyptaldy.
Sybaılas jemqorlyqqa qarsy is-qımyl agenttigi «Áskerı qurylys» aktsıonerlik qoǵamynan qarjy jymqyrý áreketi boıynsha qylmystyq is boıynsha tergeýdi ótken jyly bastaǵan.
