Laýazymdy adamdarǵa sheteldik bankterdegi shottarǵa ıelik etýi boıynsha jańa shekteý engizildi

NUR-SULTAN. QazAqparat - NUR-SULTAN. QazAqparat - Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq protseste azamattardyń quqyqtaryn qorǵaýdy jáne sybaılas jemqorlyqqa qarsy is-qımyldy kúsheıtý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Zań jobasyna Parlament depýtattary QR Prezıdentiniń 2019 jylǵy 2 qyrkúıektegi jáne 2020 jylǵy 1 qyrkúıektegi Joldaýlaryn iske asyrý maqsatynda bastamashy boldy.

Zań jobasynyń maqsaty - azamattardyń quqyqtaryn qorǵaý kepildikterin arttyrý, qylmystyq protseste taraptardyń básekelestigi men teńdigin qamtamasyz etý, sybaılas jemqorlyqqa qarsy is-qımyl jónindegi zańnamany jetildirý.

Zań jobasynyń negizgi mindetteri prokýrorǵa adam quqyqtary men bostandyqtaryn qozǵaıtyn negizgi sheshimderdi kelisý mindetin zańnamalyq júkteý, sondaı-aq sybaılas jemqorlyqqa qarsy is-qımyldyń jańa quraldaryn endirý arqyly sybaılas jemqorlyqqa qarsy zańnamany jetildirý bolyp tabylady.

Zań jobasynda 3 kodeks pen 2 zańǵa ózgerister men tolyqtyrýlar engizý kózdelgen.

Qylmystyq is júrgizý zańnamasyna adam quqyqtary men bostandyqtaryn qozǵaıtyn sotqa deıingi tergep-tekserý organdarynyń negizgi sheshimderin prokýrormen mindetti túrde kelisý týraly normalar engiziledi, bul qylmystyq protsestiń úsh býyndy modeline kóshýdiń mańyzdy kezeńiniń biri bolyp tabylady. Atalǵan tolyqtyrýlar kúdiktilerdiń (aıyptalýshylardyń) ǵana emes, jábirlenýshilerdiń de quqyqtaryn qorǵaý kepildikterin arttyrady.

Qylmystyq kodekske quqyq qorǵaý organdarynyń qyzmetkerleri men sýdıalardy, para berýshiler men deldaldardy sybaılas jemqorlyq qylmystar jasaǵany úshin jazalaýdy qatańdatý boıynsha túzetýler engizildi.

Budan basqa, aýyr jáne asa aýyr sybaılas jemqorlyq qylmystary úshin sottalǵan adamdarǵa shartty túrde merziminen buryn bosatýdy qoldaný múmkindigin alyp tastaý usynylady.

«Sybaılas jemqorlyqqa qarsy is-qımyl týraly» zańda jaýapty memlekettik laýazymdy atqaratyn adamdar jáne memlekettik fýnktsııalardy oryndaýǵa ýákilettik berilgen adamdar (máslıhattar depýtattaryn qospaǵanda) men laýazymdy adamdar úshin sheteldik bankterdegi shottarǵa ıelik etýi boıynsha sybaılas jemqorlyqqa qarsy jańa shekteý engizý kózdelgen.

Zańnamalyq aktilerdegi quqyqtyq olqylyqtardy joıý maqsatynda zań jobasyna redaktsııalyq, naqtylaý sıpatyndaǵy basqa da túzetýler engizildi.

Qazaqstan halqyna Joldaýyn jarııa etken QR Prezıdenti Qasym-Jomart Toqaev 2021 jyldan bastap memlekettik qyzmetshilerdiń shetel bankterinde esepshoty bolýyna shekteý engizý kerektigin aıtqan bolatyn.