Laýazym ıeleriniń aqshamen jasaıtyn operatsııalary boıynsha baqylaý kúsheıtiledi

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» Zańy qabyldandy, dep habarlaıdy QazAqparat tilshisi.

Zań jobasyna QR Parlamentiniń depýtattary bastamashylyq jasady.

Zań jobasy kiristerdi jylystatýǵa jáne terrorızmdi qarjylandyrýǵa qarsy is-qımyldyń ulttyq júıesin jaqsartý, sondaı-aq Aqshany jylystatýǵa qarsy kúrestiń qarjylyq sharalaryn ázirleý tobynyń (FATF) halyqaralyq standarttaryn iske asyrý maqsatynda ázirlendi.

Senattyń Qarjy jáne bıýdjet komıtetiniń qorytyndysyna qaraǵanda, «Jarııa laýazymdy adamdar» uǵymy engiziledi, ol ulttyq jáne sheteldik memlekettik laýazymdy adamdarǵa bólinedi. Bul rette Agenttik ulttyq jarııa laýazymdy adamdardyń tizimin júrgizetin bolady, olardyń tizbesin Qazaqstan Respýblıkasynyń Prezıdenti bekitedi.

«Tsıfrlyq aktıvter (qamtamasyz etilgen) salasynda óz qyzmetin júzege asyratyn tulǵalardy QR Tsıfrlyq damý, ınnovatsııalar jáne aeroǵarysh ónerkásibi mınıstrligine baqylaý-qadaǵalaý fýnktsııalaryn aıqyndaı otyryp, osyndaı sýbektiler úshin týyndaıtyn aqparattandyrý salasyndaǵy ýákiletti organdy óz qyzmetiniń bastalǵany týraly habardar etý mindettemelerin engize otyryp, qarjy monıtorıngi sýbektileriniń qataryna jatqyzý usynylady. Oıyn bıznesi boıynsha shekti mándi 3 mln teńgeden 1 mln teńgege deıin, sondaı-aq jyljymaıtyn múlikpen mámileler boıynsha 200 mln teńgeden 50 mln teńgege deıin tómendetý usynylady, bul kiristerdi zańdastyrý jáne terrorızmdi qarjylandyrý salasyndaǵy kóleńkeli ortada jasalatyn qylmysty anyqtaýǵa múmkindik beredi», - delingen komıtet málimetinde.

«Jobada elimizdegi laýazymdy tulǵalardyń aqshamen jáne ózge múlikpen jasaıtyn operatsııalary boıynsha tıisti baqylaýdy zańnamalyq deńgeıde belgileý kózdelgen. Al qarjy monıtorıngi agenttigi, óz kezeginde osy adamdardyń jáne otbasy músheleriniń, jaqyn týystarynyń jeke tizimin júrgizetin bolady. Sondaı-aq, jobada tsıfrlyq aktıvterdi shyǵarý, olardyń saýda-sattyǵyn uıymdastyrý, osy aktıvterdi aqshaǵa, ne bolmasa basqa múlikke aıyrbastaý jónindegi qyzmetterdi júrgizetin tulǵalardy, qarjy monıtorıngi sýbektilerine jatqyzý qarastyrylǵan. Mekemeniń zańdy ıesi týraly málimetterdiń ashyqtyǵyn belgileý maqsatynda ýákiletti organǵa ulttyq tiziliminiń derekterine qol jetkizý usynylǵan», - dedi senator Baqtybaı Shelpekov

Osy zań jobasymen, Qazaqstan Respýblıkasynyń tórt zańyna tıisti ózgerister men tolyqtyrýlar engiziledi.