Laýazymdy tulǵalardyń óz betinshe sheshim qabyldaý fýnktsııasy joıyldy

ASTANA. KAZINFORM – Memlekettik qyzmet isteri agenttigi tóraǵasynyń orynbasary Salaýat Múksimov memlekettik qyzmettegi laýazymdy tulǵalardyń sheshimdi óz betinshe qabyldaýyna tyıym salý sebebin túsindirdi.

«Sybaılas jemqorlyqqa qarsy saıasatty kúsheıtý maqsatynda laýazymdy tulǵalardy óz betinshe sheshim qabyldaý fýnktsııasynan aıyrdyq. Qazir sheshimder komıssııa arqyly qabyldanady. Onyń quramynda sarapshylar bar. Bul ádis sheneýnikterdiń ózine de tıimdi. Óıtkeni laýazymdy tulǵa jaýapkershilikti jeke basyna almaıdy. Onyń ústine sybaılas jemqorlyq jáne laýazymdy tulǵaǵa senimsizdik tanytý saıasaty jaǵynan da mańyzdy», - dedi Salaýat Múksimov Ortalyq kommýnıkatsııalar qyzmetinde ótken baspasóz máslıhatynda.

Spıkerdiń málimdeýinshe, sheshimdi komıssııanyń kómegimen qabyldaý – tıimdi qural.

«Komıssııa bir sheshimge kelmegenniń ózinde, ol mıssııasyn oryndap tur. Sebebi onyń quramynda ártúrli vedomstvo músheleri bar. Jer qatynastary salasynda oblystyq jer ýchaskelerin berý jónindegi komıssııalar taratyldy. Sebebi ol mıssııa aqtalmady jáne oǵan kóp ýaqyt ketti», - deıdi agenttik ókili.

Buǵan deıin S.Múksimov memlekettik qyzmetterdi alýda bıýrokratııa faktileri áli de baryn aıtqan edi. 

Sondaı-aq, brıfıng barysynda memlekettik qyzmetshi jemqorlyq jasasa, kim otstavkaǵa ketý kerektigine túsinik berildi.