Latynsha «Álippe» oqýlyqtary daıyndalyp jatyr - Bilim mınıstri
«Ótken jyly Elbasy, Úkimet bizdiń bilim salasyna, jastarymyzǵa, ustazdarǵa erekshe nazar aýdaryp, úlken qamqorlyq kórsetip, osynyń arqasynda birshama mańyzdy máseleler sheshildi. Aldaǵy oqý jylynyń basty mindeti -ustazdardyń jaǵdaıyn jaqsarta otyryp, bilim berý uıymdarynyń jaýapkershiligin arttyrý. Búginde memlekettik-jekeshelik áriptestik mektepke deıingi bilimde eń jaqsy damyǵan. Jekemenshik balabaqshalar úlesi 30%-dan asty. Al 3-6 jastaǵy balalardy balabaqshamen qamtýdy 93 paıyzǵa jetkizdik», - dedi Saǵadıev.
Onyń sózine qaraǵanda, «Balapan» baǵdarlamasy arqyly balabaqshalardaǵy jalpy oryn sany halyqtyń suranysynan asty. Biraq bul respýblıka boıynsha kórsetkish. Ókinishke qaraı, aımaqtarda teńgerimsizdik bar.
«Bul jaǵdaı mıgratsııaǵa baılanysty. Іri qalalarda, ásirese Almaty men Astanada tapshylyq úlken. Odan keıingi mańyzdy jumys - ol balabaqshaǵa kezekke turý men joldama berýdi tolyǵymen elektrondy formatqa aýystyrý. Sonda kezek jarııa túrde jáne tez jyljıtyn bolady», - dedi mınıstr.
Sonymen qatar ol kelesi jyldan bastap nólinshi synyp tárbıeshileri men muǵalimderin daıyndaý sharalary bastalatynyn atap ótti.
«Latynsha «Álippe» jáne kırılıtsada «Býkvar» bazalyq oqýlyqtaryn daıyndaý jumysy júrip jatyr. Oqýlyqtar 2020-2021 oqý jylyna daıyn bolady», - dedi vedomstvo basshysy.
