«Latyn qarpine kóshýge asyqpaýymyzdyń syry nede?» - respýblıkalyq basylymdarǵa sholý
***
«Keshe elordada elimizdiń agroónerkásip kesheni jetistikteriniń VI respýblıkalyq «Qaraótkel-2012» jármeńkesi ashyldy. «Metro» saýda ortalyǵy aýmaǵynda jurtshylyqty qaýyshtyryp otyrǵan atalǵan kórmeniń ashylý saltanatyna Premer-Mınıstr Kárim Másimov qatysty», - dep jazady «Egemen Qazaqstan» gazeti. «Halqynyń jartysyna jýyǵy aýylda turatyn Qazaqstan úshin agroónerkásiptik keshen ekonomıkanyń eń mańyzdy salasy bolyp tabylady. Elbasymyz Nursultan Nazarbaevtyń tikeleı qamqorlyǵy arqasynda Qazaqstan aýylsharýashylyǵy damyǵan álemdik derjavalardyń qataryna qosyldy. Oǵan búgingi jármeńkedegi ónimder kýá. Jármeńke mamandardyń ózara qarym-qatynasyna, aımaqaralyq baılanystardyń nyǵaıýyna, taýar aınalymynyń ósýine zor yqpal etedi», - dep atap ótti Úkimet basshysy ashylý saltanatynda.
***
«Alash aınasy» gazetiniń turaqty «Dat!» aıdarynda aqyn, jyrshy, ónertanýshy Jumabaı Esekeevpen aradaǵy suhbat «Ulttyq ónerdiń keshendi nasıhatyn oılastyrýymyz kerek» degen taqyryppen berilgen. Basylym tilshisiniń barlyq saýalyna tuşymdy jaýap bergen aqyn: «Tyńdarmannyń talǵamy ósse, ónerpazdar da soǵan saı deńgeıi kóteriledi. Búkil álemde teńdesi joq án ónerimizdi burmalamaı, saf qalpynda saqtaýdyń mehanızmi jolǵa qoıylý kerek. Kontsertke shyǵatyn ónerpazdar kórkemdik keńestiń syn súzgisinen ótse, nur ústine nur bolar edi. Sonymen qatar, qazaq ónerpazdary tize qosyp jumys istese, kóptegen asýlardy baǵyndyrary sózsiz, jumystarynda da bereke bolady. Tarydaı shashylyp júrip, árkim árqalaı tartqannan eshkim utpaıdy, kerisinshe, odan ulttyq óner men halyq utylady», - deıdi.
***
Sońǵy ýaqytta Qazaqstanda memlekettik tildi kırıllıtsadan latyn álipbıine kóshirý týraly másele jan-jaqty talqylanýda. Shyndyǵyna kelgende, el arasynda latyn álipbıine kóshýdi qoldaıtyndar da, qarsylyq bildirýshiler de tabylýda. Eger ótkenge kóz jibersek, qazaq halqynyń jazba óneri óziniń tarıhynda úsh kezeńdi (bastapqyda - arab jazýy, odan soń - latyn álipbıi, aqyr sońynda - kırıllıtsa) basynan ótkergen. Osy rette «Aıqyn» gazeti el turǵyndaryn tolǵandyryp otyrǵan mańyzdy másele týraly zııaly qaýym ókilderiniń pikirlerin bilgen. Olar «Latyn qarpine kóshýge asyqpaýymyzdyń syry nede?» degen taqyryppen berilip otyr.
***
«Osydan 7 jyl buryn Ertis ózeninde bir kórinip joq bolyp ketken alyp balyq taǵy da belgi berdi. Sondyqtan da sýǵa shomylar aldyn 100 ret oılanyp alyńyz», -dep jazady «Vremıa» gazeti. Basylymnyń atap ótýinshe, 2005 jyly balyqshylardyń biri ózennen uzyndyǵy keminde 5 metr bolatyn alyp balyqty kórgen. Tipti ol aýyzyn apandaı ashyp, balyqshyǵa tap bergen de eken. Sál keıinirek bul derekti Semeıdiń tótenshe jaǵdaılar basqarmasynyń burynǵy bastyǵy Qajybek Isabaev ta rastaǵan edi. Mine osy izi sýyp bara jatqan oqıǵa qaıta kóterildi. Jaıynǵa uqsas balyqty Semeı turǵyny da kórgen. Semeı qalasynyń sýda-qutqarý qyzmetiniń ádiskeri Tasbolat Kóshkimbaev qala turǵyndaryn sýda túskende barynsha abaı bolýǵa shaqyrýda. Óıtken ol jyrtqysh balyq bolý da múmkin.
***
«Kazahstanskaıa pravda» gazetiniń jazýynsha, aǵymdaǵy jyly búkil álemdik qoǵamdastyq mereıtoıyn atap ótetin L. Gýmılevtiń esimi Shyǵys Qazaqstandaǵy ataýsyz shyńdardyń birine berildi. Altaı taýynyń shyńdarynyń birine ǵalymnyń atyn berý bastamasyn L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov kótergen.
***
«Almatyda Qazmemtsırk dırektorynyń orynbasary qyzmetine saıqymazaq Murat Mutyrǵanovtyń taǵaıyndalýy tóńireginde daý týyndady. Onyń áriptesteri Eńbek jáne halyqty áleýmettik qorǵaý mınıstrligine hat joldaǵan. Onda 28 jastaǵy ártistiń el zańnamasyn, onyń ishinde «Jemqorlyqpen kúres» Zańyn óreskel buza otyryp, basshylyq qyzmetke taǵaıyndalǵandyǵy aıtylǵan», - dep jazady «Vremıa» gazeti. Maqala «Bez vsıakıh fokýsov» degen taqyryppen berilgen.
