Latyn grafıkasyndaǵy álipbıdi engizýde qoǵamdyq pikir barynsha eskerilip otyr - Qundyzaı Erimbetova

ASTANA. QazAqparat - Latyn grafıkasyndaǵy jańa álipbıdi qabyldaý eń aldymen jalpyhalyqtyń qoldaýǵa ıe bolyp, ony engizý turǵysynda qoǵamdyq pikir barynsha eskerilip otyr. QR BǴM Memleket tarıhy ınstıtýtynyń jetekshi ǵylymı qyzmetkeri Qundyzaı Erimbetova latyn álipbıine qatysty osylaı dep pikir bildirdi, dep habarlaıdy «QazAqparat» HAA tilshisi.

«Eń aldymen, jańa álipbıdiń jasalýy qoǵamnyń zor qoldaýyna ıe. Menińshe, halqymyzdyń basym bóligi latyn álipbıine kóshýdi qoldap otyr. Ekinshiden, memlekettiligimiz órkendep, shekaramyz bekitilgennen keıin ulttyq álipbıimiz de bolýy kerek. Elbasy óz sózinde aıtyp ketkenindeı, jalpy túrki elderinde Túrkııada, Ázerbaıjaıda, Ózbekstanda álipbıin bekitken kezde qoǵamdyq pikirdi eskerip, kóptiń talqysyna salý Qazaqstandaǵydaı kólemde bolmaǵan. Bul turǵyda qoǵamdyq pikir barynsha eskerilip otyr», - deıdi Qundyzaı Erimbetova.

Onyń aıtýynsha, álipbıdi negizdeıtin mamandar. Til mamandary tyń qadamdy tarıhı aspektide zerttep, bir ǵana til ınstıtýty latyn grafıkasyn zerdeleý jumysymen 15 jyl boıy aınalysyp kele jatyr.

«Tájirıbelik turǵyda kórsetý úshin bekitilmegen bolsa da latyn grafıkasynda maqalalardyń bir nusqalary gazet-jýrnaldar arqyly halyqqa usynyldy. Buǵan qosa 1929-1940 jyldardaǵy halqymyzdyń ózindik tájirıbesi baryn da umytpaǵan abzal. Bılik qoǵamdyq pikirmen sanaspaıtyn bolsa, onda kúni keshe Parlamentte usynylǵan birinshi nusqasy qoldanysqa enetin edi. Kúni keshe de álipbıdiń sońǵy nusqasyn halyqqa keńinen tanystyrý jumysy tapsyryldy. Negizinen «bir árip - bir dybys» degendi negizge alǵany da qoǵamdyq pikirdiń áseri. Sońǵy shyǵarylǵan nusqa adamdardyń kóńilinen shyǵyp jatyr dep oılaımyn. Biraq, qoǵam tarapynan usynystar áli bar», - deıdi ol.

Qundyzaı Erimbetova óz sózinde jalpyhalyqtyq qoldaýǵa ıe bolǵan latyn álipbıine kóshý jumysy zaman talaby, zańdy qubylys ekenin aıtady.

«Otyra bersek, EKSPO-ny ótkizbes edik, Qazaqstan-2050 Stragetııasyn da jasamas edik. Jańa álipbı memlekettiń týy men eltańbasy sekildi, ǵasyrdan ǵasyrǵa ótedi. Ulttyq múdde turǵysynan alǵanda álipbıimizdi tezirek bekitýimiz kerek», - dep túıdi Qundyzaı Erimbetova.