Latyn grafıkasyna negizdelgen jańa álippe 2020 jyldan bastap engizilýi múmkin
ASTANA. QazAqparat - Latyn grafıkasyna negizdelgen jańa álippe 2020 jyldan bastap engizilýi múmkin, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, mektepterde latyn grafıkasyn engizý jumysy eki jyldan keıin bastalady.
«Dál qazir latyn grafıkasyn engizý kestesi joq. Degenmen, jospar boıynsha «0»-inshi synyptan bastaımyz. Oǵan eki jyl beriledi. Osy jumysty 2020 jylda bastaımyz dep otyrmyz. Bárimen aqyldasyp, jan-jaqty qarastyryp, álippe daıyndap, eń aldymen osy jumysty jasap, sosyn ary qaraı qarastyratyn bolamyz. Sondyqtan biz latyn grafıkasyna úlken aprobatsııa jasap, jańa álippeni daıyndaımyz. Odan keıin ony saraptamadan ótkizemiz. Sosyn barlyǵyn muǵalimdermen, mektep dıretkorlarymen, sarapshylarmen keńinen talqylaýymyz qajet. Sóıtip, naqty bir kesteni qabyldap, latyn grafıkasyn asyqpaı engizýimiz kerek», - dedi E.Saǵadıev jýrnalısterge bergen suxbatynda.
Mınıstrdiń aıtýynsha, latyndy engizýdi asyqpaı bastasaq ta, ol jumysty úzbeı júrgizý kerek.
«Árıne, asyqpaý qajet. Alaıda bir ret bastap ketkennen keıin toqtaýǵa bolmaıdy, latynǵa tolyǵymen kóshýimiz kerek. Sondyqtan qazirden bastap barlyq máselelerdi eskergen jón. Latyn álipbıiniń jańa nusqasy jaqsy. Maǵan unady», - dep atap kórsetti E.Saǵadıev.
