Latyn árpimen bilim alyp kelgen oralman balalardy qazaq mektepterinde oqytý qıyndyq týdyryp otyr - G. Seıitmaǵanbetova
ASTANA. Aqpannyń 24-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Úkimet basshysynyń atyna depýtat Gúlnár Seıitmaǵanbetova saýal joldady,
dep habarlaıdy QazAqparat.
«Osydan eki jarym jyl buryn Elbasynyń jarlyǵy boıynsha Mańǵystaý oblysy Aqtaý qalasy mańyndaǵy eldi mekender men saıajaılarǵa qonystanǵan oralmandardyń áleýmettik máselelerin sheshý maqsatynda Munaıly aýdany qurylǵan bolatyn. Sodan beri aýdan halqynyń sany 48 myńnan 90 myńǵa deıin ósti. Aýdanǵa kórshi elderden kóship kelýshiler legi búgin de tolastar emes. 2009 jyly aýdanǵa 4 myń 414 jany bar 990 otbasy, al 2010 jyldyń basynan beri 433 adamdy quraıtyn 102 otbasy kóship keldi. Olardyń basym kópshiligi mektep jasyndaǵy balalar. Bıylǵy oqý jylynda kelgen oralman balalardyń sanynyń ózi 1 myń 103-ke jetti», dedi depýtat.
Degenmen, depýtattyń aıtýyna qaraǵanda, oralman otbasylardyń balalaryn Qazaqstan mektepterinde oqytýda, olardy ortaǵa beıimdep, kiriktirýde birtalaı problemalar týyndaǵan. Atap aıtqanda, oralman balalardyń basym kópshiligi kórshiles elderden latyn áripteri boıynsha bilim alǵan. «Nátıjesinde, tómengi synyptardy bylaı qoıyp, 8-10-11 synyptarǵa kelgen bala kırıll áripterin tanymaıtyndyqtan, memlekettik standart talabyna saı bilim ala almaı otyr. Onyń ústine, kórshiles elder mektepterindegi oqý baǵdarlamalary bizdiń júıemizge kelmeıtindigi de qıyndyq týdyrady», dedi G. Seıitmaǵanbetova. Máselen, onyń aıtýynsha, Túrikmenstanda qazaq tili, Qazaqstan tarıhy sekildi pánderdi aıtpaǵanda, orys tili, geografııa, bıologııa pánderi múldem oqytylmaıtyn kórinedi. «Sondyqtan, máseleni sheshý úshin oralman balalarǵa qosymsha sabaqtar oqytý qajet, bul úshin tıisti mınıstrlikter arqyly qarajat bólinse deımin. «Otanym!» dep kelgen jas urpaq óz elinde sapaly bilim alýǵa quqyly», dedi G. Seıitmaǵanbetova.
