Latyn Amerıkasynda koronavırýs juqtyrǵandar sany 7 mıllıonnan asty
ASÝNSЬON. QazAqparat – Reuters esepteýlerine sáıkes, Latyn Amerıkasynda koronavırýs juqtyrý derekteriniń sany beısenbide 7 mıllıonnan asty. Habarlamada aıtylǵandaı, keıbir elder álemde koronavırýstyq ınfektsııanyń deńgeıi joǵary óńirde koronavırýs juqtyrǵandar sanynyń azaıýyn tirkeı bastaǵan.
Derekter kórsetkendeı, orta eseppen bir táýlik ishinde aýrý kórsetkishi sońǵy jeti kúnde, sársenbide shamamen 77 800 jaǵdaıǵa deıin tómendegen. Ótken aptada bul kórsetkish 85 000-ǵa jetti, dep habarlaıdy QazAqparat Reuters-ke silteme jasap.
Amerıka Qurama Shtattarynan tys jerlerde eń kóp zardap shekken Brazılııa beısenbi kúni 44 235 jańa aýrý jaǵdaıy jáne 984 saǵat ishinde 24 kisi ólimi tirkelgeni týraly habarlady. Osylaısha eldegi koronavırýspen aýyrǵandardyń jalpy sany 3 761 391 adamdy qurady, COVID-19 qurbandarynyń sany 118 649-ǵa jetti.
Alańdatarlyq kórsetkishterge qaramastan, Brazılııa bıligi elde kúndelikti koronavırýs jaǵdaılarynyń azaıýy baıqalady dep málimdeıdi.
Meksıka bıligi de aýrý jaǵdaılary sanynyń turaqty tómendeýin baıqap otyrǵandyǵyn habarlady. Degenmen Dúnıejúzilik densaýlyq saqtaý uıymy (DDSU) Latyn Amerıkasynda halyq sany boıynsha ekinshi orynda turǵan eldegi pandemııanyń aýqymy baǵalanbaǵanyn aıtady.
DDSU Meksıka jáne óńirdegi basqa da elderge koronavırýsty testileý kólemin ulǵaıtý kerek dep málimdedi. Sonymen qatar, jastar arasynda koronavırýstyq ınfektsııanyń joǵary deńgeıine alańdaýshylyq bildirdi.
Brazılııa, Perý, Meksıka, Kolýmbııa jáne Chılı áli kúnge deıin álemdegi koronavırýs jaǵdaıy órship turǵan 10 eldiń qataryna kiredi. Perýde COVID-19-dan 28 000-nan astam ólim tirkeldi, bul óńirdegi jan basyna shaqqandaǵy ólim-jitimniń eń joǵary kórsetkishi.
Sársenbide Argentınada pandemııa bastalǵannan keıin alǵash ret bir kúnde koronavırýs juqtyrǵandardyń sany 10 000-nan asty. Beısenbide el bıligi keıbir provıntsııalarda qatań oqshaýlaý rejımin qaıta kúsheıtti.
Latyn Amerıkasyndaǵy COVID-19 jaǵdaılarynyń sany nebári 13 kúnde 6 mıllıonnan 7 mıllıonǵa deıin ósti.
