Latyn Amerıkasy men Fınlıandııada koronavırýs juqtyrǵan alǵashqy jaǵdaı tirkeldi
SAN-PAÝLÝ. QazAqparat – Sársenbi Brazılııanyń Densaýlyq saqtaý mınıstrligi koronavırýstyń jańa túrin (COVID-19) juqtyrǵan alǵashqy jaǵdaıdy rastady, dep habarlaıdy Agencia Brasil agenttigine silteme jasap.
Latyn Amerıkasynda koronavırýsty alǵash juqtyrǵan brazııalııalyq San-Paýlý qalasynyń 61 jastaǵy turǵyny. Agenttiktiń málimetinshe, ol aqpannyń 9-21 aralyǵynda Italııanyń soltústigindegi Lombardııada bolǵan. Ótken juma kúni sapardan elge oralǵannan keıin odan koronavırýs belgileri anyqtalǵan. Atap aıtsaq, dene qyzýy kóterilgen, qurǵaq jótel, tamaǵy aýyryp, tumaý bolǵan. San-Paýlý aýrýhanasynda birqatar testiler tapsyrǵannan keıin, nátıjesi vırýstyń bar ekenin rastaǵan.
Baspasóz konferentsııasy barysynda Brazılııanyń Densaýlyq saqtaý mınıstri Lýıs Enrıke Mandetta patsıent ózin jaqsy sezinetinin, úıinde bolatynyn habarlady. Ol vırýstyń jazda tropıkalyq elde qalaı ótetinin bılik baqylap otyratynyn aıtty. Mandetta sondaı-aq elde vırýstyń taralýyn tejeý sharalary týraly málim etti.
Sársenbi kúni keshke Fınlıandııada koronavırýs juqtyrýdyń alǵashqy jaǵdaıy týraly jarııalandy. Helsinki Times-tyń habarlaýynsha, Fınlıandııa turǵyny jaqynda Italııanyń soltústigine jasaǵan saparynyń nátıjesinde koronavırýs juqtyrǵan.
Naýqas Mılannan Helsınkıge jeksenbide oralǵan, sodan beri tek eki adammen sóılesken. Dárigerler olarmen baılanysqa shyqty, biraq ázirge ekeýinde de vırýstyń belgisi joq.
Helsınkı aýrýhanasy janyndaǵy ýnıversıtettiniń málimetinshe, atalmysh jaǵdaıda vırýs juqtyrý qaýpi óte tómen ekeni jáne baqylaýda ekeni belgili boldy.
Koronavırýs Eýropaǵa birtindep kelip jatyr. Alǵashqy ınfektsııa juqtyrý jaǵdaılary Aýstrııa men Horvatııada, Norvegııada, Rýmynııada tirkelgen. Germanııa turǵynynyń COVID-2019 koronavırýs juqtyrǵany anyqtaldy.
Eýropada eń alańdatarlyq jaǵdaı Italııada bolyp otyr, onda 11 adam COVID-2019 vırýsynan kóz jumǵan.
