Latyn álipbıine kóshýge almatylyq etnomádenı birlestikter qoldaý bildirdi
«Bul erteńnen bastap latyn álipbıimen jazyp ketemiz degen sóz emes. Halyqqa biz ózimizdiń tarıhı tamyrymyzǵa oralyp jatqanymyzdy jetkizýimiz kerek. 1940-shy jyldarǵa deıin latyn árpimen jazdyq. Latyn álipbıimen jazatyn sheteldikter elimizge kelgende qazaq áripterin oqýǵa qınalady. Qazaq tilin latyn álipbıine kóshire otyryp biz, álemdik mádenıetpen aralasamyz, qazaq tilin keńinen tanytamyz. Qazaqstan budan tek utady. Biz Nursultan Nazarbaevtyń birneshe kitabyn latyn árpine aýystyrý barysynda biraz qıyndyqtarǵa kezdestik. Biraq, izdendik, sózderdiń balamasyn taptyq», - dedi QHA Tóraǵasynyń orynbasary Abýlfas Hamedov.
Sonymen qatar, Qazaqstan halqy Assambleıasy Tóraǵasynyń orynbasary bul baǵdarlama orys tilinen bas tartý emes ekenin aıtty.
«Qazaqstan halyqtarynyń Assambleıasy qashanda el Prezıdenti Nursultan Nazarbaevtyń ıdeıalaryn júzege asyrýshy bolyp qala beredi. Biz qazaq tilin latyn álipbıine kóshirýdi tolyq qoldaımyz. Bul - ómirdiń ózi týdyrǵan qajettilik. Eldi de, ultty da biriktiretin pármendi kúsh - til. Bul orys tilinen bas tartý degen sóz emes. Elbasy memlekettiń damýy úshin latyn álipbıine kóshý qajettigin baıqady jáne máseleni der kezinde kóterip otyr», - dedi Abýlfas Hamedov.
Aıta keteıik, búgin Qazaqstan halqy Almaty Assambleıasynyń músheleri «Dostyq úıinde» bas qosty. Sharany Almaty qalasynyń ákimdigi men Qazaqstan halqy Assambleıasy uıymdastyrdy. Jıyn barysynda qazaq tiliniń latyn álipbıine kóshýi týraly pikirler aıtylyp, fılologtar men etnomádenı birlestik ókilderi oıyn ortaǵa saldy.
Jıynda «Barbang» Qazaqstan kúrdteri qaýymdastyǵynyń basshysy Knıaz Mırzoev qazaq tiliniń latyn álipbıine kóshýin tolyq qoldaıtynyn jetkizdi.
«Menińshe bul úderisti jedeldetken jón. Keıbireýler bul isti memlekettegi jańalyq retinde aıtady. Biraq, múldem olaı emes. Latynǵa kóshý buǵan deıingi bolǵan úrdisti qaıta jańǵyrtý. Óıtkeni, qazaq tili latyn álipbıin qoldanǵany tarıhı shyndyq. Men qazaqtyń buǵan deıingi álipbıine qaıta oralýyn qoldaımyn ári bul latyn álipbıin qoldanatyn memlekettermen yntymaqtastyqty arttyrady», -dedi ol.
Jıynǵa qatysýshylar latyn álipbıine kóshý kóp qıyndyqtar týǵyzbaıtynyn, óıtkeni shet el tilin úırenshiler úshin bul álipbı kópshilikke tanys degen pikir bildirdi.
