Latyn álipbıine kóshýdi júzege asyrý úshin arnaıy komıssııa qurylyp, baǵdarlama qabyldanýy tıis - M. Baqtııaruly

Búgin Senattyń jalpy otyrysynda Úkimet basshysynyń atyna saýal joldaǵan depýtat Murat Baqtııaruly osy máseleni kóterdi.

Sóz arasynda senator 2006 jyly Qazaqstan halqy Assambleıasynyń HІІ sessııasynda Elbasy N. Nazarbaevtyń latyn álipbıine qatysty kózqarasy men usynysyn aıtyp ótti. «Elbasynyń osy tapsyrmasy men latyn álipbıine kóshýdiń qanshalyqty mańyzdylyǵyna qaramastan, ókinishke oraı bul máseleni áli de bolsa tek qana  talqylaýdan, usynys aıtýdan árige apara almaı otyrmyz. Endigi arada saıası-ekonomıkalyq, ǵylymı jáne halyqaralyq mańyzy bar bul máseleni kidirtýdiń qajeti joq  dep oılaımyn. Óıtkeni ǵalamtor men uıaly baılanystyń jazarmandary men paıdalanýshylary ásirese, búgingi jas býyn ókilderi latyn álipbıin áldeqashan paıdalanyp ta júr», - deıdi senator.   Onyń aıtýynsha, Elbasy latyn álipbıine kóshý máselesine ózi qoldaý bildirip otyrǵanda, endigi arada bul máseleni soza bermeı jan-jaqty saraptamadan ótkizý qajet. Ahmet Baıtursynov atyndaǵy til ınstıtýty  latyn álipbıine kóshýdiń  jobasyn  ázirlep te qoıǵan. Bul ınstıtýt mamandary eń áýeli óz elimizdiń tarıhyndaǵy álipbı reformasynyń, sonymen qatar óz táýelsizdikterin alǵannan keıin kırılıtsadan latynǵa kóshken  Ózbekstan, Túrkimenstan, Ázerbaıjan elderiniń tájirıbelerin  zerttep, jınaqtap otyr.

«Bul reformanyń saıası salmaǵy da bar. ıAǵnı, latyn álipbıine kóshý arqyly Qazaqstannyń túrik álemimen jaqyndasýy odan ári arta túsedi.  Elimizdiń memlekettik mártebesine zor yqpal etedi. Sonymen birge shet elderde turatyn qandastarymyz úshin óz  atamekenimen qarym-qatynas jasaýlaryn da jeńildete túser edi. Latyn álipbıine kóshý isi táýelsiz Qazaqstannyń óz sharýasy. Sondyqtan da bul máseleni sheshý úshin jan-jaqqa qaraılaýdyń, bolmasa muny saıasılandyrýdyń qajeti joq qoı dep sanaımyz. Latyn álipbıine kóshý týraly qoǵamdyq pikir aıtylyp boldy,  tolyqqandy usynystar men pikirler ábden jetkilikti. Endigi arada bul máseleni  qaıtadan talqylaýǵa salyp, qaıtadan qoǵamdyq pikirdi zertteýdiń eshbir qajettiligi joq dep bilemin. Bulaı jasar bolsaq, onda bul máseleni sheshý taǵy da uzaqqa sozylyp ketýi ábden múmkin. Osyǵan jol bermeı, qazirgi ýaqytta jasalyp, daıyn turǵan usynystardy júzege asyrý úshin Memlekettik komıssııa quryp, latyn álipbıine kóshýdiń arnaıy baǵdarlamasyn qabyldap, 2013 jyldyń 1 qyrkúıeginen bastap elimizde kırıllıtsa men latyn álipbıi keminde bes jyldaı ótpeli kezeń sheńberinde qatar júrgizilýin júzege asyrý qajet dep esepteımin», - deıdi depýtat.