Latyn álipbıine kóshpeımiz, oralamyz – Gennadıı Shıpovskıh

NUR-SULTAN. QazAqparat – «Biz latyn álipbıine kóshpeımiz, oralyp jatyrmyz». QR Parlamenti Májilisiniń depýtaty Gennadıı Shıpovskıh jalpyulttyq dıktant barysynda osyndaı pikir bildirdi.

«Latyn álipbıine kóshýdiń tereń maǵynasy bar. Ǵylymı-ınnovatsııalyq jańǵyrý júrip jatqan ınternet dáýirinde álemdik aǵymnan qalmaýymyz kerek. Latyn álipbıiniń basty artyqshylyǵy osynda. Biz búgingi tańda latyn álipbıine kóshpeımiz, biz latyn álipbıine oralamyz. Óıtkeni, sonaý tarıhı derekterge súıenetin bolsaq, 1929 jyldan bastap 1940 jylǵa deıin el aýmaǵynda latyn álipbıi qoldanylǵanyn jaqsy bilesizder. Búgin sol ótkenniń esesin qaıtarýǵa yńǵaıly kezeń týyp otyr. Biz buǵan uzaq jol júrip keldik. Qazir latyn álipbıine aýysý qarqyndy júrýde. Osy protsess nátıjeli jalǵasyp, óz jemisin beredi degen senim bar. Parlament qabyrǵasynda áriptesterimmen latyn álipbıine qatysty áńgime bola qalǵan kezde depýtattardyń barlyǵy oń kózben qaraıtynyn baıqap júrmin. Latyn álipbıi onsyz da bizdiń ómirizge dendep enip ketken. Avtokólik nómirinen bastap kóshedegi jarnamaǵa deıin bizdiń kózimizdi latyn álipbıine úıretip jatyr. Sondyqtan, ony meńgerý qazaqstandyqtar úshin qıynǵa soqpaýy kerek», - dedi depýtat.

Eske salsaq, búgin 180 myń qazaqstandyq bir mezette latyn álipbıinen dıktant jazdy.