«Latyn álipbıin bıyl anyqtap, qabyldaýymyz kerek» - BAQ-qa sholý
***
«Egemen Qazaqstan» basylymynda bokstan memlekettik jattyqtyrýshysy Bolat Abdrahmanovtan alǵan suhbat basylyp, onda federatsııanyń ótken jyly atqarǵan jumystary, osy jyly ótetin álem chempıonaty men basqa da joba-josparlary týraly baıandalǵan. «Bıyl Qazaqstan sport tarıhynda tuńǵysh ret eresekter arasynda álem chempıonatynyń ótetinin bilesizder. Bul buryn-sońdy bolmaǵan oqıǵa jáne onyń bir ereksheligi ol 1986 jyldan beri alǵash ret shlemsiz ótetin bolady. Bul báseke sporttyq kúntizbege sáıkes, 4-20 qazan aralyǵynda Almatyda ótedi. Qazirdiń ózinde oǵan bizdiń ulttyq qurama komanda daıyndyǵyn bastap ketti. Quramanyń bas jattyqtyrýshysy - Myrzaǵalı Aıtjanov. Komandadaǵy ózgeristerge kelsek, Olımpıada chempıony, eki dúrkin álem chempıony Serik Sápıevtiń qolǵabyn shegege ilgenin bilesizder. Qazir onyń ornyna Danııar Eleýsinov kapıtan bolyp otyr. Álemde 69 keli salmaqty qazaqtar salmaǵy dep te aıtyp júr ǵoı. Danııar Olımpıadadan keıin osy salmaqqa aýysyp, endi qazir álem chempıonatyna daıyndalyp jatyr»,-deıdi Bolat Úkibaıuly.
Osy basylymnyń jazýynsha, tórtkúl dúnıeni ekonomıkalyq tyǵyryq qursaýyna alǵan jahandyq qarjy-ekonomıkalyq daǵdarysynyń aıaqtalar kezeńin kórýdiń aýyly alys sııaqty. Qurlyqtardyń bárin qursaýlaǵan bul ekonomıkalyq kúızelisti sarapshylar san-saqqa júgirtip, daǵdarystyń birinshi tolqyny, daǵdarystyń ekinshi tolqyny, daǵdarystyń sozylmaly saldary degen sııaqty boljamdar jasady. Birqatar dýaly aýyz sarapshylar tarıh tabaldyryǵyn attaǵan jylan jyly jahandyq daǵdarys quryqtalyp, dúnıe júziniń ekonomıkasy jańa damý soqpaǵyna túsedi degen saryndaǵy pikirlerin alǵa tartqan edi. Alaıda, ekonomısterdiń ekinshi bir toby bul pikirdi joqqa shyǵaryp, «qýyrdaqtyń kókesin túıe soıǵanda kóresiń» degendeı, ekonomıkalyq kúızelistiń keremeti áli alda degen tujyrymdaryn dáleldep baǵýda. Bul saraptamalyq maqala gazettiń búgingi sanynda «Jahandyq ekonomıka Jylan jylǵy jaǵdaı qandaı?» degen taqyryppen berilgen.
***
«Aıqyn» basylymynyń jazýynsha, latyn jazýyna kóshý - EKSPO-2017 kórmesine daıyndyqtyń bir baǵytyna aınalýy kerek. Bul týraly senator, akademık, fılosofııa ǵylymdarynyń doktory, professor Ǵarıfolla Esim gazetke bergen suhbatynda aıtty. Ol aldaǵy bes jylda keıbir salalardy latyn grafıkasyna aýystyrýǵa bolady dep esepteıdi. Bul suhbat basylymnyń búgingi sanynda «Latyn álipbıin bıyl anyqtap, qabyldaýymyz kerek» degen taqyryppen jarııalandy.
Osy basylymda «Álemdi výnderkındter qutqara ma?» atty maqala berilgen. Tájirıbeli psıhologtardyń paıymdaýynsha, bárin «ishten» bilip týǵan kishkentaı danyshpandardyń qataryna enetin erekshe zeıindi balalar, ıaǵnı myńnyń ishinen bireý shyǵatyn výnderkındterdiń kóbisi qoǵamnan laıyqty ornyn ala almaıdy eken. Nege? Munyń sebebi daryndy balalardyń kóbisi naqty ómirge beıimdele almaıdy nemese óte aýyr túrde ıkemdeletin kórinedi.
***
«Astana aqshamy» gezetinde elordadaǵy Tilderdi damytý basqarmasynyń bastyǵy, onomastıkalyq komıssııa tóraǵasynyń orynbasary Erbol Tileshevpen bolǵan suhbat kópshilik nazaryna usynylyp otyr. «Sońǵy eki-úsh jyldyń bederinde onomastıkalyq ataýlardy berýge moratorıı jarııalanǵan. Alaıda, osy ýaqytta usynystar óte kóp tústi. Sońǵy tolyqtyrylǵan, ózgertilgen zań sondaǵy kóp suraqtarǵa jaýap beredi»,-deıdi basqarma bastyǵy. Bul suhbat «Onomastıkadaǵy ádiletsizdikten qutyldyq» degen taqyryppen jaryq kórdi.
