Latyn álipbıi jastardyń tanymyn keńeıtedi - Ǵalym Baıtuq
Aqtóbege kelgen qoǵamdyq top Qazaqstan halqy Assambleıasynyń ǵımaratynda ózge ult ókilderimen, qoǵam belsendilerimen kezdesti.
«Táýelsizdik alǵan jyldary elimizde kóptegen mańyzdy sheshimder qabyldanyp, tarıhı oqıǵalardyń kýási boldyq. Meniń oıymsha, sonyń eń úlkeni - jańa Astana salý, ekinshisi - latyn álipbıine kóshý. Bul ulttyq kodtyń jańǵyrýyn, jańa kezeńniń bastalǵanyn bildiredi. Bári jastarǵa qajet. Jastar latyn álipbıindegi qundy ǵylymı zertteýlerdi oqıdy, tanymyn keńeıtedi», - dedi bloger, qoǵam qaıratkeri Ǵalym Baıtuq.
Qoǵamdyq top músheleri dıgraf, apostrof máselesi áli de talqylanatynyn, latyp álipbıin qabyldaý kezinde fılolog, lıngvısterdiń pikiri eskerilip, ǵalymdar jumys isteıtinin jetkizdi. Kezdesý kezinde ardagerler men qoǵam qaıratkerleri latyn álipbıine kóshýdi qoldaıtynyn jetkizdi.
«Biz - latyn álipbıinde saýat ashyp, ata-ájemizge kitap oqyp bergen urpaqpyz. Qazir bul bastamanyń kóterilgenine, jańa dáýirdiń bastalǵanyna qýanyp júrmiz. Biz óz ata-babamyz hat almasqan, qujat júrgizgen álipbıge qaıta oraldyq»,- dedi Aqtóbe oblystyq ardagerler keńesiniń tóraǵasy Keńes Birmanov.
Kezdesý barysynda aqtóbelikter túsindirý toby jergilikti jerde de qurylýy kerek dep usynys aıtty. Sebebi, latyn álipbıine kóshýdiń ult úshin mańyzy zor ekenin kez kelgen qazaqstandyq sezinip, bilýi tıis.
«Latyn álipbıine kóshý - saıası sheshim. Ár qazaq tarıhı sáttiń týǵanyn túsinip, qoldaý bildirýi kerek. Biz birge barlyq qıyndyq pen kedergini jeńemiz, jańa dáýirdi bastaımyz. Kezdesý kezinde aǵa urpaqqa qıyn bolady dep jıi aıtatyn edim. Biraq el aralap júrip, zeınetkerlerdiń de rýhanı jańǵyrýǵa úles qosýǵa daıyn ekenin kórdim. «Biz de úırengimiz, táýelsizdiktiń sımvoly bolǵan tildi meńgerip, nemeremizben birge sabaq oqyǵymyz keledi» dep aıtty. Qazaq eliniń bolashaǵyna sengen adam, bolashaǵyn Qazaqstanmen baılanystyrǵan adam balasyn qazaq mektebine beredi»,- dedi saıasatker Ámirjan Qosanov.
Buǵan deıin habarlaǵanymyzdaı, qoǵamdyq top Aqtóbedegi stýdenttermen de kezdesti .