Latyn álipbıi tól tilimizdiń túleýine kómektesedi - Búrkitbaı Aıaǵan

ASTANA. QazAqparat - QR Bilim jáne ǵylym mınıstrligine qarasty Memleket tarıxy ınstıtýtynyń dırektory Búrkitbaı Aıaǵannyń aıtýynsha, latyn álipbıi týǵan tilimizge erkindik beredi. Oryssha oılaýdyń qursaýynan qutylýǵa múmkindik beredi, dep xabarlaıdy QazAqparat tilshisi.

«Birinshiden, latyn álipbıiniń sońǵy nusqasy 32 áripten turady. Burynnan kele jatqan keıbir áripter túsip qalsa da, oǵan renjıtin eshteńesi joq. Qaıta óz tilimiz tól qalpyna túsip, túlep shyǵa keledi. Bul jerde mańyzdy bir máseleni eskerý kerek, qazir qoldanyp júrgen latyn áripterimen syrtqa shyǵa almaımyz. Óıtkeni kompıýter qabyldamaıdy. Sondyqtan xalyqaralyq talaptarǵa baǵynýǵa májbúr boldyq», - dedi Aıaǵan QazAqparat tilshisine bergen suxbatynda.

Ǵalymnyń aıtýynsha, sońǵy 70-75 jylda biz oryssha oılap, óz tilimizdi kırıllıtsa arqyly baǵalaıtyn jaǵdaıǵa jettik. Bul - óte qaýipti jaǵdaı. Al latyn álipbıi týǵan tilimizge erkindik, burynǵy qursaýdan shyǵýǵa múmkindik bergeli otyr. «Ekinshi bir másele, Prezıdentke kórsetilgen nusqadaǵy áripter qoldanýǵa óte yńǵaıly. Hat ta, shyǵarma da jazýǵa bolady. Ózge eldermen aralasýǵa jaǵdaı jasaıdy. Úshinshiden, latyn álipbıi baıaǵy til tarıxymyzǵa, rýxanı jańǵyrýmyzǵa ákeledi. Eń bastysy, biz bul bastamaǵa úlken daıyndyqpen kelip otyrmyz», - dep atap kórsetti Búrkitbaı Aıaǵan.