Latyn álipbıi álem ádebıetine jol ashady - jazýshy Tabyl Qulııas
«Latyn álipbıine kóshý álem ádebıetine jol ashyp, álemdik ǵylymdy meńgerýge múmkindik beredi. Kórshi memleketterdiń kóbi latyn qarpine ótip ketkenin bilemiz. Latyn álipbıi qazaqqa jat emes. Buryn da atalarymyz latyn árpimen oqyǵanyn bilemiz», - deıdi jazýshy.
Tabyl Qulııas sondaı-aq, Barnaýyldaǵy arhıvti aqtarǵan ýaqytta kezdestirgen bir oqıǵany eske alady.
«Qazirgi qoldanystaǵy kırıll álipbıiniń eski slavıandyq úlgisi qazirgisinen áldeqaıda bólek. Men mysaly arhıvterdi aqtarǵanymda eski slavıandyq jazýdyń qazirgi qoldanystaǵy úlgisinen ózgeshelikteri baryn kórdim. Dese de, arhıv qyzmetkerleri burynǵy úlgini oqı beredi. Orystardyń eski slavıandyq ádisten qazirgi qoldanystaǵy álipbıge ótý ádisin de eskerý kerek. Kırıll álipbıine úırenip qalǵandar latyn álipbıine kóshkende qınalyp qalarmyz dep te jasqanýy múmkin. Latyn álipbıine ótýdiń, menińshe, eshbir qıyndyǵy joq. Qaıta sózimiz, dybysymyz ornyna, qalpyna keledi. Kele jatqan urpaqty oılaýǵa tıispiz», - deıdi Tabyl Qulııas.
Sonymen birge, jazýshy bılik jańa álipbıdi halyqpen talqyǵa salǵannan esh utylmaıtynyn aıtady.
«Ortaq talqy - durys baǵyttaǵy jumys. Birqatar máselelerdi eskerip, jańa álipbıge dybystyq úndestigimizge saı keletin áripter qosylýy múmkin. Mysaly meniń 43 kitabym shyqty. Keıbir jazýshylar álipbı aýyssa, shyǵarmalarymyzdy eshkim oqymaı qoıady dep oılaýy yqtımal. Men olaı túsinbeımin. Qazir meniń kitaptarymdy ınternet arqyly latyn álipbıine aýdaryp, Mońǵolııa, Qytaı qazaqtary oqyp alyp jatyr. Tek qana jaqsy kitap jazý kerek. Jaqsy kitap óshpeıdi. Ony qashan da taýyp alady, oqıdy», - deıdi Tabyl Qulııas.
