Latvııanyń jańa Prezıdenti Egıls Levıts bılikke qalaı keldi
NUR-SULTAN. QazAqparat - 29 mamyr kúni Latvııada jańa Prezıdent saılandy. QazAqparat tilshisi Egıls Levıtstiń ómiri men eńbek jolyna jergilikti BAQ málimetterine súıene otyryp, taldaý jasady.
Aıta keterligi, jańa memleket basshysyna QR Prezıdenti Qasym-Jomart Toqaev quttyqtaý hat joldaǵanyn buǵan deıin habarlaǵanbyz.
Latvııada memleket basshysyn Parlamenttiń 100 depýtaty saılaıdy. Eýropaǵa tanymal zańger, halqyn eýropalyq qundylyqtar men latysh tiliniń mańyna toptastyrýdy kózdeıtin Egıls Levıtsti 61 depýtat qoldap daýys bergen.
Sonymen, Egıls Levıts kim? Latvııa basshysy bıyl birinshi ret ashyq daýys berý arqyly saılanǵanyn aıtý kerek. Egıls Levıts 2015 jyly da saılaýda baq synap, sońǵy aınalymda súringen bolatyn. Ol kezde «Ulttyq birlestik» partııasynyń atynan synǵa tússe, bul joly koalıtsııa atynan shyqqan jalǵyz kandıdat boldy.
Latvııalyq saıttar onyń aty prezıdentikke úmitkerler qatarynda 2007 jyldan beri shyǵa bastaǵanyn jazady. Alaıda, Parlament qabyrǵasynda jaqtastarynyń az bolýy ony úlken dodadan shet qaldyryp kelgen.
BBC-ge bergen suhbatynda jańa Prezıdent ózin «partııasyzbyn» dep atap, eshkimge búıregi burmaı, obektıvti saıasat júrgizýge ýáde bergen.
«Men áleýmettik turǵydan qaraıtyn salalar bar. Munda teńsizdikti joıý qajet. Az qamtylǵandardy qoldaý - memlekettiń mindeti. Sóıte tura men lıberalmyn. Óıtkeni, adam quqyǵy bizdiń el úshin basty qundylyq bolý kerek. Kerek kezde men eskishilmin. Jańa ıdeıany qoldamas buryn onyń eskisinen artyq ekenine kózim jetýi kerek. Men ultshylmyn da. Búgingi qoǵamda ulttyq biregeılikti saqtaýdyń mańyzy zor dep oılaımyn. Men Latvııada bir ǵana til ústemdik quryp, bir ǵana bilim berý júıesi bolǵanyn qalaımyn», - deıdi Egıls Levıts.
Ol 1955 jyly Rıga qalasynda dúnıege kelgen. Orys jáne latysh mektepterinde bilim alǵan. 1972 jyly otbasy Germanııaǵa qonys aýdaryp, Gambýrg ýnıversıtetinde saıasattaný jáne quqyqtaný mamandyǵyn ıgergen. Sekseninshi jyldardyń aıaǵynda Levıts Latvııadaǵy saıasatqa tikeleı aralasa bastaıdy. Derbes el bolýdy kózdeıtin Atmoda qozǵalysynyń jumystaryna belsene aralasqan zańger «Latvııa táýelsizdigin qalpyna keltirý» deklaratsııasynyń avtory retinde el kóńilinen shyqqan. Toqsanynshy jyldardyń basynda ádilet mınıstri, Parlament depýtaty bolyp istegen ol Latvııanyń Germanııa men Aýstrııadaǵy, Shveıtsarııadaǵy elshisi qyzmetterin abyroımen atqarǵan. Sońǵy 15 jylda Eýropa odaǵy sotynyń sýdıasy retinde Lıýksembýrgte turdy.
Zańger retinde ákimshilik-protsessýaldyq kodeks pen memlekettik basqarý týraly zańdy daıyndaýǵa atsalysqan Egıls Levıts endi turmystyq kúsh kórsetý máselesin túbirimen joıýǵa bekinip otyr. Bala men áıel quqyǵyn qyzǵyshtaı qorýǵa ýáde bergen jańa prezıdent jubaıymen birge bir ul, bir qyz tárbıelegen. Jasy - 63-te.
