Latvııalyq porttar qazaqstandyq júkti qabyldaýǵa ázir ekendikterin málimdedi

NUR-SULTAN. QazAqparat - Qazaqstan men Latvııa júk tasymaly máseleleri boıynsha kezdesý ótkizdi, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

2022 jylǵy 3 naýryzda QR Indýstrııa jáne ınfraqurylymdyq damý vıtse-mınıstri Berik Kamalıev pen Latvııanyń Baılanys mınıstrligi Memlekettik hatshysynyń orynbasary Ýldıs Reımanıs arasynda beıne-konferentsııa rejıminde kezdesý ótti.

Jıynǵa «Qazaqstan temir joly» UK AQ, elimizdiń iri ekspedıtorlyq kompanııalary jáne Latvııa tarapynan Lıepaıa, Rıga, Ventspıls sııaqty eń iri úsh portynyń bas dırektorlary qatysty.

QR IIDM vıtse-mınıstri Reseı Federatsııasy men Ýkraına tóńiregindegi ahýal jóninde, Antverpen, Gambýrg, Pırıneı, Rotterdam jáne Mýgga porttarynyń qazaqstandyq júkterdi qabyldaýdan bas tartýyna baılanysty Reseıdiń Sankt-Peterbýrg, Novorossıısk, Ýst-Lýga, Taman porttary arqyly júkterdi tasymaldaý barysynda qıyndyqtar týyndap jatqany týraly aıtty.

Qazaqstan Reseı aýmaǵyndaǵy júkterdi Latvııanyń Rıga, Venstpıls jáne Lıepaıa porttaryna qaraı baǵdarlaıdy. Bul sheshimge Latvııanyń teńiz porttary kelisimin berdi.

Latvııa tarapy óz porttarynyń qýaty men ótkizý qabiletine qaraı qazaqstandyq júkterdi qabyldaýǵa daıyn ekendigin málimdedi.