Latvııada parlament saılaýy ótip jatyr
ASTANA. KAZINFORM - Búgin, 3 qazanda, Latvııada 15-Seımge parlament saılaýy ótip jatyr. Saılaý ýchaskeleri jergilikti ýaqyt boıynsha saǵat 08:00-de ashylyp, 20:00-de jabylady.
Latvııa Konstıtýtsııasyna sáıkes, daýys berý quqyǵyna shamamen 1,56 mıllıon azamat ıe. 100 depýtattyq mandatqa 14 partııalyq tizimnen 1 428 kandıdat usynylǵan.
Mandattar bes saılaý okrýgi boıynsha bólinedi:
-
Rıga — 38 mandat;
-
Vıdzeme — 26;
-
Zemgale — 13;
-
Latgale — 12;
-
Kýrzeme — 11.
El aýmaǵyndaǵy kez kelgen saılaý ýchaskesinde tólqujat nemese jeke kýálik arqyly daýys berýge bolady. Aldyn ala daýys berý 2 qazanda aıaqtaldy. Juma kúngi málimet boıynsha, 174 517 adam nemese saılaýshylardyń 11,2%-y daýys bergen.
Saýalnamalarǵa sáıkes, premer-mınıstr Andrıs Kýlbergstiń tsentrıstik «Birikken tizimi» (Apvienotais saraksts) shamamen 14% qoldaýmen kósh bastap tur.
Odan keıin ıÝlııa Stepanenkonyń «Egemen bılik»/«Jas latyshtar odaǵy» (Suverēnā vara) jáne kásipker Aınars Shleserstiń «Latvııa birinshi orynda» (Latvija pirmajā vietā) partııalary shamamen 9%-dan jınap tur.
Sonymen qatar «Progressıvtiler», Ulttyq alıans, Jasyldar men sharýalar odaǵy jáne «Jańa birlik» partııalary da 5 paıyzdyq saılaý mejesinen ótýi múmkin.
Jergilikti partııalardyń eshqaısysy parlamentte basymdyqqa ıe bolady dep boljap otyrǵan joq. Sondyqtan saılaý qorytyndysy shyqqannan keıin partııalar arasynda koalıtsııa qurý jóninde kelissózder júrgiziledi.
47 jastaǵy kásipker, burynǵy avtojarysshy Andrıs Kýlbergs 2026 jylǵy mamyrdyń sońynda Latvııa úkimetiniń basshysy boldy. Buǵan deıin Evıka Sılınıa basqarǵan («Jańa birlik») úkimet Latvııanyń áýe keńistigine drondardyń kirýine qatysty oqıǵalardan keıin týyndaǵan kelispeýshilikterge baılanysty taraǵan.
Sarapshylardyń pikirinshe, Rıganyń eýropalyq baǵyty jalpy alǵanda saqtalýy múmkin. Alaıda bolashaq úkimettiń quramy saılaýda qansha partııanyń 5 paıyzdyq mejeden ótetinine jáne áli sheshim qabyldamaǵan saılaýshylardyń daýystary qalaı bólinetinine baılanysty bolady. Saýalnamalarda mundaı saılaýshylardyń úlesi shamamen besten birine jetken.
Zań boıynsha jańa Seımniń alǵashqy otyrysy 3 qarashadan keshiktirilmeı ótýge tıis.
Eske salaıyq, buǵan deıin Reseıdiń Ortalyq saılaý komıssııasy Memlekettik Dýmanyń toǵyzynshy shaqyrylymy depýtattaryn saılaýdyń qorytyndysyn bekitkenin habarlaǵan edik.
