Latvııada daǵdarys kezinde esi aýysqan adamdardyń sany arta tústi
ASTANA. 24 qańtar. QazAqparat - 2007 jyldan bastap Latvııada psıhıkalyq aýrýǵa ushyraǵan adamdardyń sany shuǵyl ósti, dep habarlady Latvııa densaýlyq saqtaý mınıstrligi halyqtyń densaýlyǵyn saqtaý jónindegi baıandamasynda.
Densaýlyq mınıstrliginiń atap ótýinshe, psıhıkalyq syrqatqa ushyraǵandardyń kóbeıýi ásirese elde ekonomıkalyq daǵdarys órship turǵan 2009-2010 jyldarda aıqyn baıqaldy, dep habarlady BaltInfo.
2009-2010 jyldary 70 jastan asqan adamdardyń psıhıkalyq aýrýlarǵa ushyraýy 38 paıyzǵa artqan. «Qoǵamnyń qartaıýyna baılanysty egde tartyp, júıkesy syr bergen adamdarǵa kútim jasaý máselesi ózekti bolyp otyr», - delingen baıandamada.
2010 jyly júıke aýrýyna shaldyqqandardy aýrýhanalarǵa jatqyzý 11,5 paıyzǵa ósken, bul elde ambýlatorııalyq kómektiń jetkiliksizdigin kórsetedi. Degenmen Latvııa densaýlyq saqtaý vedomstvosy elde ózine ózi qol salý sany 16 paıyzǵa qysqarǵanyn keltirgen. Latvııa bul kórsetkish boıynsha burynǵysha Eýroodaq elderiniń arasynda úshinshi orynǵa shyǵyp otyr.
Qujatta sondaı-aq Latvııada buǵan deıin psıhıatr-dárigerlerdiń jetkilikti bolyp kelgendigi atalyp ótken, alaıda olardyń úshten bir bóligi zeınet jasyna taqaý. Bul bolashaqta ásirese óńirlerde kadr tapshylyǵyna ákep soǵýy yqtımal.
