Latvııada aýqymdy kıbershabýyl jasalyp, 1,2 mln adamnyń deregi tarady
ASTANA.KAZIFORM - Latvııanyń Jol qozǵalysy qaýipsizdigi basqarmasyna (JQQB) jasalǵan kıbershabýyl saldarynan aýqymdy derekter tarap ketti. Atap aıtqanda qylmyskerler 1,2 mıllıon adamnyń jeke aqparatyna jáne 200 myń zańdy tulǵaǵa qatysty aqparatqa qol jetkizdi, dep habarlaıdy BelTA.
Latvııa BAQ-tarynyń habarlaýynsha, shabýyldaýshylar azamattardyń sońǵy 18 jyldaǵy jeke sáıkestendirý nómirleri, aty-jóni, kólik nómirleri men tólemderine baılanysty aqparattardy alǵan.
Alaıda, kıbershabýyl telefon nómirleri men elektrondy poshta mekenjaılary sııaqty baılanys aqparatyna áser etpegen.
JQQB kıbershabýylǵa qatysty tergeý bastady.
Azamattarǵa derekterdiń buzylýyna baılanysty alaıaqtyq qaýipter týraly eskertildi jáne JQQB nemese basqa agenttikter atynan jiberilgen habarlamalardy alý nemese telefon qońyraýlaryna jaýap berý kezinde óte saq bolý usynyldy.
Latvııa prezıdenti Edgars Rınkevıchs kıbershabýyl men derekterdiń taraýy «ulttyq qaýipsizdikke eleýli qater tóndiretinin» málimdedi.
-Jol qozǵalysy basqarmasynyń bedeline jáne bul mekemege degen qoǵamdyq senimge nuqsan keltirildi. Mundaı jaǵdaıda Jol qozǵalysy basqarmasynyń basshylyǵy óz mindetterin oryndaı almaıdy, - dep jazdy ol Facebook-tegi paraqshasynda.
Latvııa premer-mınıstri Andrıs Kýlbergs Kólik mınıstrine oqıǵaǵa baılanysty Jol qozǵalysy basqarmasy basshylyǵynyń jaýapkershiligin baǵalaýdy tapsyrdy.
Latvııa jol qozǵalysy basqarmasy kólik quraldaryn tirkeýge, tekserýge jáne júrgizýshi kýálikterin berýge, sondaı-aq eldegi kólik quraldaryn tekserýge jaýapty.
Buǵan deıin Frantsııada kıbershabýyldan zardap shekken 678 myń adamǵa habarlama jiberilgenin jazǵan edik.
