Latvııa prezıdenti men premer-mınıstri orys tiline ekinshi memlekettik til mártebesin berýge qarsy
ASTANA. 20 aqpan. QazAqparat -Latvııada orys tiline ekinshi memlekettik til mártebesin berýge baılanysty referendým ótti.
Ol úshin konstıtýtsııaǵa birqatar ózgerister engizý qajet jáne sodan keıin ulttyq zańnamany ózgertý kerek, dep habarlaıdy utro.ru saıty.
Referendým ótkizý bastamasyn «Rodnoı ıazyk» qoǵamy kótergen. Ony bul eldegi tanymal saıasatkerler men qoǵam qaıratkerleri qurǵan kórinedi. Olar ózderiniń ıdeıasyn qoldaý úshin 180 myń qol jınaǵan eken.
Atap aıtqanda, Latvııanyń resmı bıligi orys tiline memlekettik til mártebesin berýge qarsylyq tanytyp otyr. El prezıdenti Andrıs Berzınsh, premer-mınıstr Valdıs Dombrovskıs jáne seım (parlament) spıkeri Solvıta Aboltınıa memleket azamattaryna qarsy daýys berýge shaqyrǵan.
Seımdegi keıbir partııalar referendým ótkizýdi toqtatqysy keldi jáne osyǵan baılanysty Konstıtýtsııalyq sotqa saýal joldady. Olardyń talaptary qabyldanyp, qaraldy. Degenmen de sýdıalar referendým ótkizýge toqtaý salýdan bas tartty.
Latvııada 1 mln. 545 myń saılaýshy tirkeldi. Orys tili ekinshi memlekettik til mártebesin alý úshin kem degende 772 myń latvııalyq azamattardyń (50 paıyz) daýysyn alýy tıis. Sarapshylardyń esebi boıynsha orys tiline 250-300 myń adam daýys berýi múmkin.
Latvııada orys tildi halyqtyń bóligi 40 paıyzdan astam. Alaıda, olardyń basym bóliginde latvııalyq azamattyǵy joq. Sondyqtan da olar daýys berýge zańnama boıynsha qatysa almaıdy.
