Latvııa prezıdenti oppozıtsıoner Andrıs Kýlbergske jańa úkimet jasaqtaýdy tapsyrdy
ASTANA. KAZINFORM – Latvııa prezıdenti Edgars Rınkevıch oppozıtsııalyq «Birikken tizim» partııasynyń ókili, Seım depýtaty Andrıs Kýlbergsti premer-mınıstr qyzmetine usyndy jáne oǵan jańa úkimet jasaqtaýdy tapsyrdy, dep habarlaıdy Kazinform agenttiginiń Eýropalyq odaqtaǵy menshikti tilshisi.
Eske sala ketsek, osy aptada Latvııada Evıka Sılınıa úkimeti otstavkaǵa ketken edi. Jergilikti BAQ-tyń habarlaýynsha, otstavkaǵa áýe keńistigine ushqyshsyz ushý apparattarynyń basyp kirýine baılanysty bolǵan oqıǵa sebep bolǵan.
El prezıdentiniń ózi Rıga saraıynda ótken baspasóz máslıhatynda Kýlbergstiń óz tarapynan «tolyq senim men qoldaýǵa» ıe ekenin aıtty.
Oppozıtsııalyq saıasatkerge 25 mamyrǵa deıin atqarylǵan jumys týraly esep usyný tapsyryldy. Ol bolashaq koalıtsııanyń naqty qurylymyn, mınıstrlik portfelderdiń bólinisin jáne úkimet deklaratsııasynyń jobasyn qamtýy tıis.
– Mindet ońaı emes, biraq emotsııalar men ózara aıyptaýlardy shetke ysyryp, memleket múddesi úshin kelisimge kele alamyz dep senemin, – dedi Andrıs Kýlbergs prezıdentpen kezdesýden keıin.
Ol qazirgi tańda Latvııaǵa tehnıkalyq emes, qaýipsizdik pen ekonomıkadaǵy naqty máselelerdi qazan aıyndaǵy parlament saılaýyna deıin sheshe alatyn tolyqqandy ári jumysqa qabiletti bılik qajet ekenin atap ótti.
Andrıs Kýlbergs – 14-shaqyrylymdaǵy Seımniń 46 jastaǵy depýtaty, kásipker ári kólik jáne daǵdarys-menedjment salasynyń sarapshysy. Ol parlamenttik komıssııalardy, sonyń ishinde iri ınfraqurylymdyq jobalardy tekserý komıssııasyn basqarǵan. Sybaılas jemqorlyqqa, kartelderge jáne memlekettik qarajattyń tıimsiz jumsalýyna qarsy qatań ustanymymen tanymal. Sońǵy ýaqytqa deıin «Birikken tizim» partııasy oppozıtsııa qatarynda bolǵan.
Aıta keteıik, buǵan deıin 14 mamyr kúni Latvııa premer-mınıstri Evıka Sılınıa otstavkaǵa ketýge sheshim qabyldaǵanyn jazdyq.
