Latvııa porttary arqyly Qazaqstan astyǵynyń tranzıti artyp keledi
ASTANA. KAZINFORM – Aýyl sharýashylyǵy vıtse-mınıstri Ermek Kenjehanuly Latvııa Respýblıkasynyń Klımat jáne energetıka mınıstrliginiń parlamenttik hatshysy ıAnıs Irbemen kezdesti, dep habarlaıdy QR aýyl sharýashylyǵy mınıstrliginiń baspasóz qyzmeti.
Kelissózder barysynda taraptar agroónerkásiptik sala boıynsha eki el yntymaqtastyǵynyń qazirgi jaǵdaıy men bolashaq basymdyqtaryn talqylady. Atap aıtqanda, aýyl sharýashylyǵy ónimderi saýdasy, tranzıttik-logıstıkalyq ózara is-qımyl, agrarlyq ǵylym men bilim berý salasyn damytý, veterınarııalyq jáne fıtosanıtarııalyq qaýipsizdik máseleleri qaraldy.
Latvııa delegatsııasyn qarsy ala otyryp, Ermek Kenjehanuly Qazaqstan Latvııamen dostyq qatynastardy joǵary baǵalaıtynyn jáne bul eldi Eýropalyq Odaqtaǵy mańyzdy ári senimdi seriktes retinde qarastyratynyn atap ótti.
- Sizdiń saparyńyz elderimizdiń seriktestigin nyǵaıtýǵa, tájirıbelik yntymaqtastyqty keńeıtýge jáne salalyq memlekettik organdar, ǵylymı jáne bilim berý mekemeleri, sondaı-aq eki eldiń bıznes-qoǵamdastyǵy arasyndaǵy tikeleı dıalogty damytýǵa degen ózara qyzyǵýshylyqty kórsetedi, — dedi vıtse-mınıstr.
Kezdesý barysynda saýda-ekonomıkalyq yntymaqtastyq máselelerine erekshe nazar aýdaryldy. Ótken jyldyń qorytyndysy boıynsha Qazaqstan men Latvııa arasyndaǵy agroónerkásiptik keshen ónimderiniń taýar aınalymy 51,4 mln AQSh dollaryn qurady.
Ermek Kenjehanuly Qazaqstan jahandyq azyq-túlik qaýipsizdigi júıesinde strategııalyq mańyzy bar el ekenin jáne álemdegi iri astyq óndirýshilerdiń biri ekenin atap ótti. El aýmaǵyndaǵy aýyl sharýashylyǵy daqyldarynyń egis alqaby 24 mln gektardy quraıdy, onyń eleýli bóligi dándi daqyldarǵa tıesili.
Sonymen qatar, qaıta óńdelgen aýyl sharýashylyǵy ónimderiniń eksporty qarqyndy damýda. Oǵan un, quramajem, makaron ónimderi jáne tereń óńdelgen ónimder kiredi. Qazaqstan astyq eksporty boıynsha álemde 10-orynda, un eksporty boıynsha 2-orynda, kúnbaǵys maıy eksporty boıynsha 8-orynda.
Taraptar Baltyq óńiri arqyly Qazaqstannyń ósimdik sharýashylyǵy ónimderin tranzıtteý máselesin de qarastyrdy. Byltyr Latvııa porttary arqyly tasymal kólemi 750 myń tonnany qurasa, jyl basynan beri 250 myń tonnaǵa jetti.
Sondaı-aq agrarlyq ǵylym men bilim salasyndaǵy yntymaqtastyq keleshegi de nazardan tys qalmady.
Qazaq ulttyq agrarlyq zertteý ýnıversıteti men Latvııanyń Jaratylystaný ǵylymdary jáne tehnologııalar ýnıversıteti arasyndaǵy tıimdi áriptestik týraly aıtyldy. Bul rette akademııalyq utqyrlyq baǵdarlamalary, ǵylymı taǵylymdamalar jáne birlesken zertteýler júzege asyrylyp keledi.
Vıtse-mınıstr birlesken ǵylymı-zertteý jobalaryn damytýǵa, Erasmus+ baǵdarlamasy sheńberinde ótinimder berýge, akademııalyq utqyrlyqty keńeıtýge, sondaı-aq magıstratýra men doktorantýra deńgeıinde qos dıplom baǵdarlamalaryn damytýǵa qyzyǵýshylyq bildirdi.
Odan ári veterınarııa jáne fıtosanıtarııalyq baqylaý máselelerine kóńil bólindi.
Kezdesý nátıjesinde Qazaqstan men Latvııanyń tıisti qurylymdary arasynda ósimdikter karantıni salasyndaǵy yntymaqtastyq týraly ózara túsinistik memorandýmyna qol qoıyldy.
Qos tarap bul fıtosanıtarııalyq saladaǵy ekijaqty yntymaqtastyqty odan ári nyǵaıtý jolyndaǵy mańyzdy qadam ekenin, eki eldiń tıisti qyzmetteri arasyndaǵy ózara is-qımyldy kúsheıtetinin, sondaı-aq, ósimdikter karantıni men qorǵaý júıelerin jetildirýge jáne aýyl sharýashylyǵy ónimderi saýdasyn keńeıtýge yqpal etetinin atap ótti.
Sonymen qatar, taraptar búgin Astanada ótetin Qazaqstan–Latvııa bıznes-forýmy aıasynda ekijaqty yntymaqtastyq áleýetin jan-jaqty talqylap, múddeli uıymdar arasynda jańa baılanystar ornatyp, eki el arasyndaǵy seriktestikti odan ári damytýǵa tyń serpin berýge yntaly.
Osyǵan deıin Latvııanyń Qazaqstanmen AÓK salasyndaǵy yntymaqtastyqty tereńdetýge qyzyǵýshylyq tanytyp otyrǵany týraly jazdyq.
