Latvııa men Estonııa jaıaý áskerge qarsy mınalardy paıdalanýǵa tyıym salatyn Konventsııadan shyǵady
ASTANA. KAZINFORM — Latvııa Prezıdenti Edgars Rınkevıchs beısenbi kúni basqarylmaıtyn jaıaý áskerge qarsy mınalardy qoldanýǵa, saqtaýǵa jáne óndirýge tyıym salatyn Ottava konventsııasynan eldiń shyǵýy týraly zańdy maquldady, dep habarlaıdy Kazinform agenttiginiń menshikti tilshisi.
— Aımaqtyq qaýipsizdik jaǵdaıynyń ózgerýine baılanysty, Latvııa úshin óz áreketteriniń ıkemdiligin shektemeý jáne el men halyqty qorǵaýdy kúsheıtý maqsatynda ártúrli qarý-jaraq júıeleri men sheshimderdi qoldaný múmkindigin saqtaý mańyzdy, — delingen zańǵa qosymsha túsindirme jazbada.
Latvııanyń baǵalaýynsha, basqarylmaıtyn jaıaý áskerge qarsy mınalar ózge mınalar men qarý júıelerimen birge qoldanylǵanda, qorǵanys qabiletin kúsheıtedi, ony balama sheshimdermen tolyq almastyrý múmkin emes.
Sonymen qatar, Latvııa áskerı operatsııalardyń beıbit turǵyndarǵa áserin barynsha azaıtýǵa mindettenedi jáne halyqaralyq gýmanıtarlyq quqyq talaptaryn, sonyń ishinde qaqtyǵys kezinde azamattyq halyqty qorǵaý normalaryn saqtaı beretinin málimdedi.
2025 jylǵy 16 sáýirde Latvııanyń Seımi jaıaý áskerge qarsy mınalardy qoldanýǵa, saqtaýǵa jáne óndirýge tyıym salatyn Ottava konventsııasynan eldiń shyǵýy týraly zańdy úshinshi oqylymda qabyldady. Zań jobasyn 66 depýtat qoldap daýys berse, 14 depýtat — «Turaqtylyq» jáne «Latvııa — birinshi orynda» fraktsııalarynan — qarsy boldy. Eki depýtat qalys qaldy, úsheýi daýys bergen joq.
Sonymen birge, Estonııa úkimeti de beısenbi kúngi otyrysta Ottava konventsııasynan shyǵý týraly zań jobasyn maquldady.
— Qazirgi qaýipsizdik ahýalynda Qorǵanys kúshterine qaýip-qater sıpatyna jáne yqtımal qarsylastyń áreketine qaraı qarý-jaraq júıeleri men sheshimderin tańdaýda qosymsha erkindik pen ıkemdilik qajet, — delingen Estonııa zań jobasyna berilgen túsindirmede.
Sondaı-aq Estonııamen qatar Lıtva, Polsha jáne Fınlıandııa da Ottava konventsııasynan shyǵý rásimin bastaǵany habarlandy.
Aıta ketelik Latvııa áıelder úshin mindetti áskerı qyzmetti engizýi múmkin.