Latvııa Qazaqstanmen AÓK salasyndaǵy yntymaqtastyqty tereńdetýge qyzyǵýshylyq tanytyp otyr
ASTANA.KAZINFORM — Aýyl sharýashylyǵy mınıstri Aıdarbek Saparov Latvııa Respýblıkasynyń Qazaqstandaǵy Tótenshe jáne Ókiletti Elshisi Datse Rýtkamen kezdesti.
Taraptar ekijaqty yntymaqtastyqty nyǵaıtýdyń jáne agroónerkásiptik keshen salasyndaǵy ózara is-qımyldy keńeıtýdiń ózekti máselelerin ortaǵa saldy.
Ótken jyldyń qorytyndysy boıynsha Qazaqstan men Latvııa arasyndaǵy AÓK ónimderiniń taýar aınalymy 51,4 mln AQSh dollaryn qurady. Qazaqstan eksportynyń negizinen raps tuqymy, kúnjara, bıdaı, maqta talshyǵy, dándi jáne maıly daqyldar boıynsha úlesi zor.
Aıdarbek Saparov Latvııa Qazaqstan úshin senimdi ári ejelgi seriktes ekenin atap ótti. Atap ótkenindeı, bizdiń elimiz atalǵan memleket naryǵyna eksport kólemin ulǵaıtýǵa jáne jetkizilim baǵyttaryn ártaraptandyrýǵa yntaly.
Mınıstrdiń aıtýynsha, agrarlyq sektor turaqty ósim kórsetip keledi. Byltyr aýyl sharýashylyǵynyń jalpy ónimi 5,9%-ǵa artyp, 20 mlrd AQSh dollaryna jetti. Ekinshi jyl qatarynan 27 mln tonna astyq jınaldy. Astyq eksporty kólemi jyl saıyn artýda, sondaı-aq jetkizilimderdi odan ári arttyrýdyń múmkindigi zor.
Kezdesýde logıstıka máselelerine erekshe nazar aýdaryldy. Latvııa Eýropalyq odaq jáne Soltústik Eýropa naryqtaryna shyǵýdy qamtamasyz etetin astyq pen maıly daqyldardy saqtaý jáne qaıta tıeý salasynda strategııalyq seriktes sanalady. Baltyq baǵyty Qazaqstannyń eksporttyq baǵyttaryn ártaraptandyrýdyń mańyzdy tetigine aınalýda.
2025 jyly Baltyq elderi porttary arqyly 802 myń tonna astyq eksporttaldy. Onyń 441,2 myń tonnasy Latvııanyń Rıga erkin porty jáne Lıepaıa porty arqyly jóneltildi. «Azyq túlik kelisimshart korporatsııasy» Lıepaıa porty arqyly Marokkoǵa 58 myń tonnadan astam bıdaı shyǵardy.
Óz kezeginde Datse Rýtka latvııalyq tarap úshin negizgi yqpaldastyq baǵyttaryna toqtaldy. Atap aıtqanda, akvaósirýdi damytý, aýyl sharýashylyǵy ónimderin qaıta óńdeý, veterınarııa salasyndaǵy áriptestik, tájirıbe almasý, birlesken kásiporyndar qurý, sondaı-aq aýyl sharýashylyǵy ǵylymy men selektsııa salasyndaǵy ózara is-qımyl máseleleri talqylandy.
Aıta ketelik Batys Qazaqstanda barlyq egis kólemi 626 myń gektar bolmaq.
