Latvııa halqy eýro aımaǵyna kirýge qarsy
ASTANA. 6 maýsym. QazAqparat - Latvııanyń «Lat úshin, eýroǵa qarsymyz!» qoǵamdyq birlestigi ulttyq valıýtany saqtaý máselesi boıynsha jalpyhalyqtyq referendýmdy ótkizýdi qalaıdy.
Osyǵan oraı, uıym el azamattarynyń qolyn jınaýǵa kiristi.
«Belta» aqparattyq agenttigi habarlaǵandaı, Latvııa eliniń zańnamasyna sáıkes, naýqan barysynda notarıýspen rásimdelgen 30 myń qol jınalýy shart. Osydan keıin Ortalyq saılaý komıssııasy onyń barlyǵyn resmı túrde esepteıdi. Búginde «Lat úshin, eýroǵa qarsymyz!» birlestiginiń bastamasyna eldiń basqa da qoǵamdyq uıymdary qoldaý bildirdi. Olar óz músheleri arasynda qol jınap, tıisti materıaldyq kómek kórsetýge de daıar. Buǵan deıin oppozıtsııa «elde eýrony engizý merizimi jalpyhalyqtyq referendýmda anyqtalýy tıis» degen bastamany kóterip, zańmen bekitýdi usynǵan bolatyn. Alaıda Latvııanyń Seımy atalǵan qujatty qaıtaryp jiberdi.
Aıta keteıik, osydan úsh jyl buryn Latvııa úkimeti 2014 jyly 1 qańtardan bastap eýro aımaǵyna kirý týraly sheshim qabyldaǵan. Búginde Eýropalyq odaq komıssııasy Latvııanyń makroekonomıkalyq kórsetkishterin barlyq talaptarǵa saı dep tanyp otyr. Degenmen, qazirgi qoǵamdyq saýalnama kórsetip otyrǵandaı, Latvııa halqynyń 50 paıyzdan astamy eýro valıýtasyn engizýge qarsy.
