Latvııa fermerleri jaýyn-shashyn saldarynan 93 mln eýroǵa jýyq shyǵynǵa batty
ASTANA. KAZINFORM — Latvııada uzaqqa sozylǵan jaýyn-shashyn saldarynan jalpy kólemi 79 myń gektarǵa jýyq jer zardap shekken, dep habarlaıdy AZERTADJ.
Al aýyl sharýashylyǵyndaǵy aldyn ala eseptelgen jalpy shyǵyn 93 mıllıon eýroǵa jýyq.
Latvııa radıosy men Latvııa teledıdarynyń jańalyq portalyna silteme jasap habarlaǵandaı, bul kórsetkishter tamyz aıynyń sońyna deıin jınalǵan Jergilikti qoldaý qyzmetiniń (SPS) derekterine negizdelgen.
Latvııa Aýyl sharýashylyǵy mınıstrligi Eýropalyq komıssııa men basqa da múshe elderdiń nazaryn eldegi erekshe qolaısyz jaǵdaıǵa aýdardy. Mınıstrlik jaýyn-shashynnyń aýyl sharýashylyǵyna aıtarlyqtaı áser etkenin málimdep, Latvııa úkimeti aýyl sharýashylyǵy sektorynda 5 tamyz ben 4 qarasha aralyǵynda tótenshe jaǵdaı jarııalaǵanyn habarlady.
Estonııa da 2025 jylǵy vegetatsııa kezeńi qatty jaýyn-shashyn men burshaqtyń saldarynan qıyn bolǵanyn málimdedi. Estonııada sáýirden shildege deıingi vegetatsııalyq kezeńdegi jaýyn-shashyn mólsheri ortasha eseppen normadan 134%-ǵa asyp, keıbir óńirlerde bul kórsetkish 170%-dan da joǵary bolǵan.
Estonııalyq fermerler kóptegen qıyndyqqa tap boldy: egis alqaptarynyń sý basýy, eginshilik jumystarynyń kúrdelenýi, ónimniń azdyǵy, eginniń kesh jáne baıaý jınalýy, aýrýlar men aramshópterdiń basýy, kúzdik daqyldardy kesh egý jáne taǵy basqa máseleler. Osy aptada Estonııa Aýyl sharýashylyǵy mınıstri EO-nyń aýyl sharýashylyǵy jáne azyq-túlik jónindegi komıssaryna hat joldap, qalyptasqan jaǵdaı týraly habarlap, fermerlerge aýyl sharýashylyǵy rezervi esebinen jedel kómek kórsetýdi surady.
Artyq jaýyn-shashyn Eýropanyń basqa da óńirlerinde baıqaldy – atap aıtqanda, Danııada, Germanııanyń soltústigi men soltústik-shyǵysynda, Polshanyń soltústiginde, Rýmynııanyń soltústik-ortalyǵynda, Italııanyń soltústik jáne ortalyq bólikterinde, sondaı-aq Ispanııanyń Jerorta teńizi jaǵalaýynda.
Sonymen birge, Eýropada 1 shilde men 16 tamyz aralyǵynda aýa raıy jaǵdaıy birkelki bolmady. Jaýyn-shashynnyń aıtarlyqtaı tapshylyǵy Pıreneı túbeginiń soltústik-batysynda, Frantsııanyń ońtústik-batysynda, Rýmynııanyń ońtústiginde, Bolgarııa men Grekııanyń kóp bóliginde, sondaı-aq Qara teńiz jaǵalaýlarynda tirkeldi. Bul óńirlerdiń kóbinde orman órtteri boldy.
Buǵan deıin Lıtva, Latvııa men Estonııa jaıaý áskerge qarsy mınaǵa tyıym salý konventsııasynan shyqqanyn jazǵanbyz.