Latvııa depýtattaryna orys tilinde sóılesýge tyıym salyndy

ASTANA. KAZINFORM — Latvııa Seımi (parlament) depýtattarǵa keńse ǵımarattarynda orys tilin qoldanýǵa tyıym salatyn jáne olardy latysh tilinde sóıleýge májbúrleıtin túzetýlerdi qabyldady. Bul týraly ISM portaly habarlady.

Parlament ǵımaratynda depýtattardan tek memlekettik til – latysh tilin ǵana qoldaný talap etiledi. Jańa normalar depýtattardyń ózara qarym-qatynasyna da, olardyń azamattarmen qarym-qatynasyna da qatysty.

Seım ǵımarattarynda basqa tilderdi qoldaný zań buzýshylyq retinde qarastyrylatyny atap ótildi.

Sondaı-aq, túzetý til normasynan bólek, tótenshe jaǵdaılarda nemese ózge de erekshe jaǵdaılarda depýtattardyń parlament komıtetteriniń otyrystaryna qashyqtyqtan qatysý múmkindigin qarastyrady. Mundaı qatysý komıssııa tóraǵasymen aldyn ala kelisilýi shart. Otyrysqa tóraǵa ózi qatysýy kerek.

Sondaı-aq zańǵa depýtattardy qylmystyq jaýapkershilikke tartýǵa qatysty da túsindirmeler qosyldy. Atap aıtqanda, qylmystyq is depýtat qyzmetine kiriskenge deıin qozǵalsa da, endi qylmystyq qýdalaýdy jalǵastyrý úshin Seımniń kelisimi qajet.

Buǵan qosa, Latvııa úkimeti reseılik Telegram arnalarynyń barlyǵyn jaýyp tastaǵysy keletini belgili boldy. Olar bul sharany respýblıka kóleminde orys tiliniń taralýyna qarsy kúresý qajet dep túsindiredi.

Eske sala keteıik, Latvııa men Estonııa jaıaý áskerge qarsy mınalardy paıdalanýǵa tyıym salatyn Konventsııadan shyǵady.