Latynamerıkalyq jankúıerler Dımashtyń «Angel Love» ánin qazaq tilinde oryndady

ASTANA. KAZINFORM — Dımash Qudaıbergenniń Latyn Amerıkasyndaǵy jankúıerleri «Latam, Voices of Love» jobasy aıasynda erekshe beınebaıan usyndy. 

 Argentına, Meksıka, Perý, Chılı, Bolıvııa, Ýrýgvaı, Domınıkan Respýblıkasy jáne Kosta-Rıka elderinen jınalǵan Dears ónerpazdyń repertýaryndaǵy júrekti terbeıtin týyndylardyń biri — «Angel Love» ánin qazaq tilinde oryndady.

Ánniń mýzykasyn — Renat Gaısın, al sózin belgili aqyn Qalqaman Sarın jazǵan. Kóptegen qatysýshy úshin bul joba tek mýzykalyq tájirıbe ǵana emes, sonymen qatar qazaq tili men mádenıetine, ári Dımashtyń shyǵarmashylyǵyna degen erekshe qurmettiń kórinisi boldy.

— Biz bul án arqyly tek áýezdi áýendi ǵana emes, onyń jan tebirenter rýhyn jetkizgimiz keldi. Dımashqa jáne onyń shyǵarmashylyǵyna degen mahabbat — til men mádenıet shekarasynan tys, búkilálemdik qubylys ekenin dáleldegimiz keldi, — dep bólisti jobaǵa qatysýshylar.

Aıta ketelik Dımashtyń mýzykalyq jobasy Kaspıı men Bozjyranyń sulýlyǵyn álemge pash etken edi.