Latyn Amerıkasyndaǵy eń iri ýnıversıtettiń bilim berý baǵdarlamasyna Qazaqstan týraly taqyryptar engizildi
ASTANA. KAZINFORM – Meksıkanyń Ulttyq avtonomııalyq ýnıversıtetinde (UNAM) – sol eldegi ári búkil Latyn Amerıkasyndaǵy eń iri joǵary oqý ornynda Azııaǵa arnalǵan dıplomdyq kýrs ótti. Atalǵan kýrs aıasynda Qazaqstannyń mádenıeti men gýmanıtarlyq áleýetine erekshe nazar aýdaryldy, dep jazdy dimashnews.com.
Bul jobanyń bastamashysy Dımash Qudaıbergenniń Meksıkadaǵy fan-klýby boldy. Joba sheńberinde Qazaqstanǵa qatysty taqyryptar bilim berý baǵdarlamasyna engizildi.
Buǵan deıin klýb ókilderi ýnıversıtet ákimshiligimen bolashaqtaǵy mádenı yntymaqtastyq múmkindikterin talqylaǵan bolatyn.
Uıymdastyrýshylardyń aıtýynsha, Qazaqstanǵa degen qyzyǵýshylyq sáýir aıynda Naýryz merekesine arnalǵan is-shara ótkizilgennen keıin artqan. Dál sol kezde ýnıversıtet qazaqstandyq ónerpazdyń jankúıerleriniń qyzmetimen tanysyp, mádenı baılanystardy odan ári damytý jónindegi bastamany qoldaǵan edi.
Baǵdarlamaǵa qatysý úshin Ortalyq Azııanyń mádenı qaýymdastyǵynyń ókilderi – Irına Vagner (Argentınadaǵy Rosarıo qalasyndaǵy Qazaqstan ortalyǵy) jáne Marsııa Kastro (Chılıdegi Casa de Asia Central uıymy) shaqyryldy.
Kýrs barysynda qatysýshylar Qazaqstannyń bilim berý men dıplomatııa arqyly qalyptasatyn «jumsaq kúsh» saıasatyn, sondaı-aq zamanaýı poezııa men onyń óńirdiń mańyzdy mádenı-fılosofııalyq beınesi sanalatyn dala uǵymymen baılanysyn talqylady.
– Kıiz úı jaı ǵana baspana emes . Ol utqyrlyqqa, tabıǵatpen úzdiksiz úndestikke jáne qaýymdastyq sezimine negizdelgen dúnıetanymnyń kórinisi edi, – dep atap ótti Irına Vagner.
Sonymen qatar ol mádenı ózara yqpaldastyqtyń mańyzyn erekshe atap ótti.
– Shynaıy kúsh májbúrleý arqyly emes, qyzyǵýshylyqty oıatyp, adamdar arasynda baılanys ornatý arqyly qalyptasady. Uzaq merzimdi ári mándi yqpal mádenıet, bilim jáne ózara almasý arqyly júzege asady, – dedi.
Marsııa Kastro óz baıandamasyn Ortalyq Azııanyń mádenı murasyndaǵy tabıǵı keńistiktiń róline arnady.
– Dala men shól – bos keńistik emes. Olar tarıh, biregeılik, jady jáne kórkem shyǵarmashylyq toǵysatyn jandy mekender, – dep atap ótti.
Uıymdastyrýshylar bastamany qoldap, UNAM akademııalyq qaýymdastyǵyn Qazaqstan mádenıetimen tanystyrýǵa úles qosqan spıkerlerge alǵys bildirdi.
Dımash Qudaıbergenniń jankúıerleriniń aıtýynsha, bul joba Qazaqstan mádenıetin halyqaralyq deńgeıde nasıhattaý jáne mádenı-gýmanıtarlyq bastamalardy damytý baǵytyndaǵy jumystardyń zańdy jalǵasyna aınaldy.
Dımashtyń latynamerıkalyq jankúıerleri qazaq tilindegi halyqaralyq jobany tanystyrǵanyn jazǵan edik.
