Latakııada qaýipsizdik kúshteri men Asad jaqtastary arasynda qaqtyǵys bastaldy

ASTANA.KAZINFORM — Reseıdiń áýe bazasy ornalasqan Sırııanyń Latakııa provıntsııasynda qaýipsizdik kúshteri men bılikten qýylǵan prezıdent Bashar Asadtyń jaqtastary arasynda qııan-keski qaqtyǵys boldy, dep jazady VVS.

Londonda ornalasqan Sırııadaǵy adam quqyqtaryn baqylaý uıymynyń (SOHR) málimetinshe, qaqtyǵystan keminde 70 adam qaza tapty. Uıymnyń atap ótýinshe, bul jeltoqsandaǵy Asad taqtan taıdyrylǵannan bergi eń kúshti qaqtyǵys boldy.

SOHR málimetinshe, qaza tapqandar arasynda qaýipsizdik qyzmetkerleri, Asadqa adal jaýyngerler jáne beıbit turǵyndar da bar.

— Jaǵalaýda Qorǵanys mınıstrligi, Іshki ister mınıstrligi jáne qulatylǵan rejım armııasynyń sodyrlary arasyndaǵy qandy qaqtyǵys kezinde 70-ten astam adam qaza tapty, ondaǵan adam jaralandy jáne tutqynǵa alyndy, — dep habarlaıdy SOHR.

Buǵan deıin Sırııanyń Step aqparat agenttigi keltirgen basqa derekterge qaraǵanda, úkimet kúshteri «shamamen 70 burynǵy rejım jaýyngerin» óltirip, 25-ten astamy kepilge alynǵan.

Beısenbi kúni Sırııanyń Sana aqparat agenttigi bılikten qýylǵan prezıdenttiń jaqtastary Jerorta teńizi jaǵalaýyndaǵy Djable qalasy aımaǵyndaǵy baqylaý-ótkizý beketteriniń birine shabýyl jasaǵanyn habarlady.

Bul jerge jaqyn jerde reseılik «Hmeımım» avıabazasy ornalasqan. Jaqyn mańdaǵy Tartýsta, sondaı-aq basqa aýdandarda, sonyń ishinde Homs pen Aleppoda qaqtyǵys bolǵany habarlandy.

Latakııa provıntsııasynda juma kúni tańǵy saǵat 10-ǵa deıin komendanttyq saǵat engizilip, aımaqqa Damaskten qosymsha kúsh jiberildi.

Sırııanyń memlekettik aqparat quraldary buǵan deıin ótpeli úkimettiń qorǵanys mınıstrliginiń ókili Hasan Ǵanıdiń Asad jaqtastaryna úndeýin taratqan bolatyn.

— Myńdaǵan adam qarýyn tastap, otbasylaryna oralýdy sheshti, al keıbireýleri qylmyskerlerdi qorǵap, qashyp ólýdi jalǵastyryp jatyr. Tańdaý anyq: qarýyńdy tasta nemese bolmaı qoımaıtyn taǵdyryńmen betpe-bet kezdes, — dedi ol.

Latakııa qaýipsizdik ókili Mustafa Kneıfatı birneshe toptyń «jaqsy josparlanǵan jáne qasaqana shabýylda» óz pozıtsııalaryna shabýyl jasap, «kóptegen sarbazdy» óltirip, jaralaǵanyn aıtty.

— Biz aımaqtaǵy turaqtylyqty qalpyna keltirip, halqymyzdyń menshigin qorǵaımyz, — dep keltiredi onyń sózin AFP.

Latakııa provıntsııasynda bılikten qýylǵan prezıdent Bashar Asad tıesili úlken alavıtter qaýymy turady.

Qoǵamdastyq ókilderi elde, ásirese aýyldyq jerlerde bılik aýysqannan beri qýǵyn-súrginge ushyraǵandaryn aıtady.