Las Vegastaǵy kórmede «jasandy adamdar» tanystyryldy

NUR-SULTAN. QazAqparat – AQSh-tyń Las Vegas qalasynda CES 2020 elektronıka kórmesi bastaldy. Onda álemniń ár qıyrynan jınalǵan kompanııalar qyzyqty ónimderin tanystyryp jatyr. QazAqparat jańa tehnologııalar kórmesinde kórermen nazaryna usynylǵan jańalyqtarǵa sholýyn usynady.

Jasandy Neon adamy

Neon – Internet joq kezde dıalogta qala alatyn jasandy adam. Jobany OnyPranav Mınstrı basqaratyn Advanced Research Lab (STAR Labs) kompanııasy men Samsung Technology jasap jatyr. Jobanyń maqsaty – adamnyń beınesi men is-áreketin qaıtalaı alatyn jasandy tulǵa jasaý. Neondarmen sóılesýge bolady, biraq olar paıdaly aqparat bere almaıdy.

Olar muǵalimderdi, televızııalyq baǵdarlama júrgizýshileri men qarjy keńesshilerin almastyra alady.

Ballie aqyldy roboty

Ballie roboty – beınetaspasy bar kishigirim shar. Ol kez-kelgen jaǵdaıda aqyldy tehnıkamen baılanysa alady. Eger úıdegi ıt jerge tamaq tógip qoısa, robot shańsorǵyshty iske qosady. Uıyqtaıtyn ýaqyt jetkende «aqyldy» perdelerdi jaýyp, shamdardy sóndiredi. Ballie-diń shyǵý ýaqyty men baǵasy aıtylǵan joq.

AR-kózildirigi

Sonymen qatar, kórmede Samsung kompanııasy qyzyqty gadjet - AR-kózildirigin tanystyrdy. Ótken jyly tanystyrylǵan GEMS ekzoskeletimen birigip kózildirik ıesine jeke jattyqtyrýshymen fıtnespen aınalysýǵa múmkindik beredi. Kompanııa AR-kózildiriktiń de satylymǵa shyǵatyn ýaqyty men baǵasyn jarııalamady.

Kvanttyq buzýdan qorǵalǵan álemdegi alǵashqy avtokólik

ISARA kanadalyq kompanııasy tanystyrǵan Karma Revero GT avtokóligi elektrondyq dybystyq málimetterdi jiberip jáne qabyldaı alady. Sonymen birge, aqparat basqa bireýge málim bolýy múmkin dep alańdamaısyz, tipti málimetińizdi kvanttyq kompıýterdi paıdalanyp ta eshkim asha almaıdy.

Karma Revero GT elektromobılin tanystyrý maqsatynda jasalǵan úlgige ISARA Catalyst TLS synaq stendi sekildi qoljetimdi ónimder paıdalanylǵan. Olar Netpeople iNAGO júrgizýshi kómekshisiniń platformasynda qaýipsiz baılanys jasaýǵa múmkindik beredi.

Qos ekrany bar noýtbýk

ASUS kompanııasy kórme aıasynda óz klasyndaǵylardan yqshamdylyǵy, jińishkeligi jáne qýattylyǵymen erekshelenetin 14 dıýımdi ZenBook Duo-ny tanystyrdy.

Jańa ZenBook Duo barlyq parametrler boıynsha arzan ári qoldanýǵa jeńil. 4K OLED-dıspleıdiń ornyna Full HD IPS-matrıtsany qoıǵan. Noýtbýk 16 GB jady bar Intel Core onynshy býyn protsessorlarynda qoljetimdi. Sonymen qatar, NVIDIA MX250 dıskrettik beınekartasy bar.

Ekinshi 12,6 dıýımdik dıspleıdi ekinshi monıtor retinde qoldaný múmkindigi bar. Onda jumys isteýge qajetti qosymsha terezelerdi ashyp qoıýǵa, oıyndarǵa qosalqy aqparat izdeýge nemese jáı ǵana YouTube-tan vıdeo qosyp qoıýǵa bolady.

Aıta keteıik, CES (Consumer Electronics Show) — jańa gadjetterdiń, elektronıkanyń, tehnıkanyń, avtokólikterdiń jáne basqa da qurylǵylardyń jyl saıyn ótkiziletin dástúrli kórmesi. Kórmede bizge joǵary sapaly teledıdarlardy, jyldam drondardy, ózdiginen júretin alýan túrli kólik túrlerin jáne t.b. jańasha qurylǵylardy usynady.

Jańa tehnologııalar kórmesi 10 qańtarǵa deıin jalǵasady.