Las-Vegastaǵy atysta qaza tapqandardyń sany 50-ge jetti
ASTANA. QazAqparat - Las-Vegastaǵy kazınonyń mańynda jeksenbiden dúısenbige óter túnde bolǵan atystyń saldarynan 50-den astam adam qaza taýyp, 200-den astam adam jaralanǵan, dep habarlaıdy reseılik TASS agenttigi.
«50 adam kóz jumǵan, jaralanǵandardyń sany 200-den asady», - dep málimdedi Las-Vegas sherıfi Djozef Lombardo.
Polıtsııa bergen málimetterge qaraǵanda oq jaýdyrǵan adam - Nevada shtatynyń turǵyny 64 jastaǵy Stıven Peddok.
Ulybrıtanııa premer-mınıstri Tereza Meı qaıǵyly oqıǵaǵa baılanysty kóńil aıtty. «Premer-mınıstr: Ulybrıtanııanyń oılary Las-Vegastaǵy qandy shabýyldyń qurbandary men oǵan toıtarys bergen jedel qyzmettermen birge», - delingen habarlamada.
Sondaı-aq Selın Dıon jáne Meraııa Kerı sııaqty tanymal tulǵalar da qaza tapqandar men zardap shekkenderdiń týystary men jaqyndaryna kóńil aıtty.
