Las ydys, jándikter, súıek: Taldyqorǵandaǵy jekemenshik balabaqshada sanıtarlyq norma buzylǵan

TALDYQORǴAN. KAZINFORM — Áleýmettik jelide Taldyqorǵan qalasyndaǵy jekemenshik balabaqshalardyń birinde sanıtarlyq-epıdemıologııalyq talaptar óreskel buzylǵan vıdeo jarııalandy. 

Jelide taraǵan vıdeodan balalarǵa sapasy óte tómen taǵam berilip jatqany anyq kórýge bolady.

Vıdeo avtorynyń aıtýynsha, balabaqshada balalarǵa qurt túsken as pen kúıip ketken toqash usynylǵan. Las ydystar, al onyń ústinde jándikter júr. Et ornyna  súıek berilgen. 

Taldyqorǵan qalalyq sanıtarlyq-epıdemıologııalyq baqylaý basqarmasynyń habarlaýynsha, jarııalanǵan vıdeoǵa baılanysty Jetisý oblysy boıynsha Bas prokýratýrasynyń Quqyqtyq statıstıka jáne arnaıy esep komıtetiniń departamentinde jospardan tys tekseris tirkelgen.

— Tekserý nátıjesinde jaýapty tulǵalarǵa qoldanystaǵy zańnamaǵa sáıkes sharalar qabyldanady, — delingen vedomstvonyń resmı habarlamasynda.

Aıta ketelik Mańǵystaýda 3 jasar búldirshin balabaqshada aýyr jaraqat aldy.