Las aýa júkti áıelderdiń túsik tastaý qaýpin arttyrady – zertteý
NUR-SULTAN. QazAqparat - Qytaı ǵalymdary Nature Sustainability jýrnalynda maqala jarııalap, aýanyń lastanýy júktiliktiń alǵashqy úsh aıynda túsik tastaý qaýpin arttyratynyn jazdy, dep jazady Le Figaro.
«Beıjiń ýnıversıtetiniń ǵalymdary 2009 – 2017 jyldar aralyǵyndaǵy 255 myń júkti áıeldiń medıtsınalyq kartalaryn zerttep shyqty. Olar áıelderdiń bilim deńgeıi, mamandyǵy, turǵylyqty jeri sekildi krıterıılerdi eskerdi», dep jazady basylym.
Zertteý barysynda ǵalymdar ár áıel turatyn jerdiń aýasynyń lastaný deńgeıin qarap shyqty.
«Zertteý barysynda 17 477 áıeldiń (6,8%) júktiliktiń alǵashqy úsh aıynda túsik tastaǵany anyqtaldy. Ǵalymdardyń aıtýynsha, olardyń barlyǵy aýa lastaný kórsetkishi óte joǵary jerlerde turǵan nemese jumys istegen», dep jazady avtor.
Onyń aıtýynsha, ǵalymdar júkti áıelderge aýa lastanbaǵan jerlerde kóbirek bolýǵa keńes bergen. Degenmen, DDU málimetinshe, Beıjiń álemdegi eń aýasy las qalalardyń qatarynda 122-orynda turǵandyqtan, bul keńeske qulaq asý qıyn.
