Larısa Grechýshnıkova: Saılaýda áıelderge berilgen kvota genderlik saıasat tujyrymdamasyna saı keledi
Bul týraly ol Óskemen qalasynda ótken «Saılaý-2021: mańyzy men erekshelikteri» atty sarapshylar keńesiniń otyrysynda málimdedi.
«Parlament Májilisi depýtattarynyń kezekti saılaýy taıap qaldy. Barlyq saıası partııalarǵa saılaý aldyndaǵy daıyndyq jumystaryna, saılaý platformasyn ázirleýge ýaqyt berilgen. Bıyl halyq qalaýlylary tek partııalyq tizimder boıynsha saılanyp, ózin-ózi usynatyn kandıdattar qatysa almaıdy. Bul qoǵamdaǵy partııa róliniń burynǵyǵa qaraǵanda artqanynyń belgisi. Endi partııalar belsendilikti arttyryp, jańa baǵdarlamalardy, tyń bastamalardy usynýǵa umtylýy tıis», - dedi Larısa Grechýshnıkova.
Onyń aıtýynsha, saılaýda áıelder men jastarǵa 30 paıyzdyq kvotanyń berilýi depýtattyq korpýstyń jańarýyna jol ashady.
«Osyndaı ózgeris genderlik saıasattyń tujyrymdamasyna sáıkes keledi. Sondaı-aq jastardy saıası arenaǵa tartýdyń birden-bir quraly bolmaq. Máselen, Shyǵys Qazaqstan oblysy Altaı aýdandyq máslıhatyndaǵy depýtattardyń 50 paıyzy - áıelder. Nátıjesinde qandaı da bir taqyrypty talqylaǵanda jan-jaqty pikir almasýǵa, kez kelgen máseleler týyndaǵanda pragmatıkalyq sheshim qabyldaýǵa múmkindik týyp otyr. Biz depýtattyqqa ótetin jas býynnan jańasha kózqarastar kútemiz», - dedi Altaı aýdany máslıhatynyń hatshysy.
Búginde koronavırýs pandemııasyna baılanysty elimizde karantındik shekteýler engizilgen. Larısa Grechýshnıkovanyń aıtýynsha, bul saılaýǵa qatysty sharalardy ótkizýdiń tásilderin ózgertedi.
«Saılaý kezinde halyqtyń densaýlyǵy basty nazarda bolýy tıis. Sondyqtan sanıtarlyq talaptar qatań saqtalyp, áleýmettik qashyqtyq pen maska rejıminiń buzylmaýyn baqylaýdy kúsheıtý qajet», - dedi ol.
