Laos ShYU-nyń on besinshi dıalog seriktesi atandy
ASTANA.KAZINFORM - Búgin Beıjińdegi ShYU hatshylyǵynda Laos Halyq Demokratııalyq Respýblıkasyna ShYU dıalog seriktesi mártebesin berý týraly memorandýmǵa qol qoıý rásimi ótti, dep habarlaıdy Kazinform agenttiginiń Beıjińdegi tilshisi ShYU-ǵa silteme jasap.
Memorandýmǵa ShYU atynan Bas hatshy Nurlan Ermekbaev, al Laos úkimeti atynan Premer-Mınıstrdiń orynbasary jáne Syrtqy ister mınıstri Thongsavan Fomvıhan qol qoıdy.
Qol qoıý rásimine deıin ShYU Bas hatshysy men Laos Premer-Mınıstriniń orynbasary jáne Syrtqy ister mınıstri arasynda ekijaqty kezdesý ótti.
Nurlan Ermekbaev áriptesin Laostyń ShYU dıalog seriktesi retinde resmı túrde tanylýymen quttyqtap, Ventıannyń Uıymnyń kópqyrly kún tártibin júzege asyrýǵa belsendi qatysatynyna senim bildirdi. Bas hatshy sondaı-aq ShYU-nyń aǵymdaǵy máseleleri men uıymnyń ortalyq is-sharasy - Bishkek sammıtine daıyndyqty talqylady.
Laostyń syrtqy ister mınıstri ShYU-nyń halyqaralyq arenadaǵy rólin joǵary baǵalap, óz eliniń Uıym ishindegi yntymaqtastyqtaǵy mańyzdylyǵyn atap ótti.
Memorandýmdy júzege asyrý boıynsha aldaǵy birlesken qadamdar týraly qyzý pikir almasý ótti. Taraptar sondaı-aq ShYU men ASEAN arasyndaǵy yntymaqtastyq máselelerin de qozǵady.
Rásimge ShYU múshe memleketteriniń Hatshylyqtaǵy turaqty ókilderi, Qytaıda akkredıttelgen ShYU múshe memleketteriniń jáne ShYU dıalog seriktes memleketteriniń elshileri men ókilderi, Laos Syrtqy ister mınıstrligi men ShYU Hatshylyǵynyń laýazymdy tulǵalary jáne BAQ ókilderi qatysty.
Buǵan deıin ShYU 25 jylda álemdegi eń iri transóńirlik uıymdardyń birine aınalǵanyn habarlaǵan edik.
