Laos Prezıdenti Qazaqstannyń mamandar daıarlaýǵa kórsetken qoldaýyn joǵary baǵalady
ASTANA. KAZINFORM — Laos Prezıdenti Thonglýn Sısýlıt Qazaqstanǵa sapary ekijaqty qarym-qatynasty damytýdyń mańyzdy kezeńi ekenin atap ótti. Bul týraly Aqordanyń baspasóz qyzmeti habarlady.
– Men Qazaqstandy Ortalyq Azııadaǵy Laospen árdaıym izgi ári ornyqty qarym-qatynas jasaǵan elderdiń biri retinde qarastyramyn. Qazaqstan Laosqa ult-azattyq kúres kezinen beri kómek qolyn sozyp, búginge deıin qoldaý kórsetip keledi. Álemdegi ahýal san márte ózgerse de, Qazaqstan men Laostyń qarym-qatynasy, baýyrlastyq baılanystary jáne bir-birine tileýlestigi múlde ózgergen emes. Búgingi sapar eki el arasyndaǵy dostyq baılanystardy odan ári nyǵaıtýǵa jáne keńeıtýge yqpal etedi, – dedi Laos Prezıdenti.
Thonglýn Sısýlıt Qazaqstan Laosqa mamandar daıarlaýǵa kómek kórsetetinine basa mán berdi.
– Laostyń júzdegen azamaty Qazaqstandaǵy oqý oryndarynda bilim aldy. Búginde olardyń kóbi memlekettik qyzmette, kásipkerlikte, ortalyq jáne jergilikti deńgeıde basshylyq qyzmet atqarady. Otandastarym stýdenttik jyldarda kómektesip, qoldaý kórsetkeni úshin qazaqstandyqtardy jylylyqpen eske alady. Olar qazaqstandyqtardy Laosta qarsy alýǵa da, kezdesken jerde rızashylyǵyn bildirýge de daıyn ekeni sózsiz, – dedi Laos Prezıdenti.
Kelissóz qorytyndysy boıynsha Qasym-Jomart Toqaev pen Thonglýn Sısýlıt ekijaqty yntymaqtastyqty odan ári keńeıtýge qos eldiń de múddeli ekenin rastaıtyn Birlesken málimdeme qabyldady.
Aıta ketelik Qasym-Jomart Toqaev pen Thonglýn Sısýlıt keńeıtilgen quramda kelissóz júrgizgen edi.
