Laos prezıdenti qazaqstandyq JOO-nyń qurmetti professory atandy
ASTANA. KAZINFORM — L. N. Gýmılev atyndaǵy Eýrazııa ulttyq ýnıversıtetine Laos Halyq Demokratııalyq Respýblıkasy prezıdenti Thonglýn Sısýlıt keldi, dep habarlaıdy Ǵylym jáne bilim mınıstrliginiń baspasóz qyzmeti.
Qazaqstannyń jetekshi joǵary oqý oryndarynyń birinde dáris oqyǵan Laos basshysy EUÝ men Laos ýnıversıtetteri arasyndaǵy yntymaqtastyqtyń odan ári nyǵaıa túsetinine senim bildirdi.
Thonglýn Sısýlıt memleketterdiń bolashaǵyn qalyptastyrýda jastar men joǵary oqý oryndarynyń aıryqsha ról atqaratynyn atap ótip, halyqaralyq dıalogty damytý, bilim men tájirıbe almasý jáne halyqtar arasyndaǵy ózara túsinistikti nyǵaıtýdyń mańyzdylyǵyna toqtaldy.
— Búgin Qazaqstan Respýblıkasy men Laos Halyq Demokratııalyq Respýblıkasy arasyndaǵy yntymaqtastyqtyń jańa kezeńine qadam basyp otyrmyz. Qazaqstanda bilim alǵan Laos azamattary búginde memlekettik qyzmettiń jaýapty laýazymdarynda eńbek etip, óz eliniń damýyna úles qosyp keledi. Qazirgi tańda Qazaqstanmen toǵyz negizgi baǵyt boıynsha, sonyń ishinde bilim berý salasynda yntymaqtastyqty damytýǵa daıynbyz. Sonymen qatar eki eldiń joǵary oqý oryndary arasyndaǵy baılanysty keńeıtip, atap aıtqanda, stýdentterdiń akademııalyq utqyrlyǵyn damytýǵa usynys bildiremiz, — dedi Laos prezıdenti.
Sapar barysynda Thonglýn Sısýlıt EUÝ stýdentterimen jáne professor-oqytýshylar quramymen kezdesip, halyqaralyq yntymaqtastyqty damytý, bilim berý salasyndaǵy baılanystardy nyǵaıtý jáne Qazaqstan men Laos arasyndaǵy gýmanıtarlyq qarym-qatynastardy keńeıtý taqyryptaryna arnalǵan dáris oqydy. Laos basshysy stýdentter men oqytýshylardyń suraqtaryna da jaýap berdi.
Mártebeli meımandy qarsy alǵan QR Ǵylym jáne joǵary bilim mınıstri Saıasat Nurbek Laos prezıdentiniń eldegi jetekshi joǵary oqý oryndarynyń birine kelýiniń aıryqsha mańyzyn atap ótti. Mınıstrdiń aıtýynsha, Thonglýn Sısýlıttiń, onyń ishinde bilim berý salasyndaǵy kóp jylǵy kásibı jáne memlekettik qyzmettegi tájirıbesi bul kezdesýdiń qazaqstandyq akademııalyq qaýymdastyq úshin mánin arttyra túsedi.
— Stýdentterimiz ben oqytýshylarymyz úshin Laostyń damýy men bilim berý júıesiniń qalyptasýyna kóptegen jyldar boıy úles qosqan memleket basshysynan osy eldiń ótkeni men búginine qatysty oı-pikirin bilý úlken múmkindik. Laostyń qalyptasý tarıhy, eldiń júrip ótken joly jáne onyń odan ári damý perspektıvalary jónindegi Sizdiń kózqarasyńyz akademııalyq orta úshin qyzyqty ári paıdaly bolady dep senemin. Búginde Qazaqstan men Laos arasyndaǵy, sonyń ishinde bilim, ǵylym jáne kadr daıarlaý salalaryndaǵy ózara baılanysty keńeıtýge múmkindik mol. Eki el arasyndaǵy mundaı baılanystar halyqtarymyzdyń bir-birin tereńirek túsinýine jol ashyp, jastar úshin jańa múmkindikter qalyptastyrǵanyn qalaımyz, — dep atap ótti Saıasat Nurbek.
Mınıstr Qazaqstan uzaq merzimdi damý maqsattaryna qol jetkizýde bilim, ǵylym, ınnovatsııalar men adamı kapıtaldy damytýdy negizgi basymdyqtar retinde qarastyratynyn atap ótti.
EUÝ rektory Erlan Sydyqov Qazaqstan men Laos arasyndaǵy bilim, ǵylym jáne mádenıet salalaryndaǵy yntymaqtastyqty odan ári keńeıtýge zor múmkindik bar ekenin aıtty.
— Stýdentterimiz, oqytýshylarymyz ben jas zertteýshilerimiz úshin memleket basshysynyń qazirgi damý úderisteri, halyqaralyq yntymaqtastyq, bilim berý jáne bolashaqty qalyptastyrýdaǵy jas urpaqtyń róli jónindegi kózqarasymen tanysý — úlken mártebe ári biregeı múmkindik. Búgingi kezdesý jańa birlesken bastamalarǵa, akademııalyq baılanystardy keńeıtýge jáne perspektıvaly jobalardy júzege asyrýǵa negiz bolady dep senemin, — dedi rektor.
Halyqaralyq yntymaqtastyqty nyǵaıtýǵa jáne gýmanıtarlyq baılanystardy damytýǵa qosqan úlesin moıyndaý belgisi retinde EUÝ rektory Erlan Sydyqov Eýrazııa ulttyq ýnıversıteti Ǵylymı keńesiniń Thonglýn Sısýlıtke EUÝ-dyń qurmetti professory ataǵyn berý týraly sheshimin jarııalady.
Sapar sońynda Laos Halyq Demokratııalyq Respýblıkasynyń Prezıdenti bastaǵan delegatsııasy Túrki jazba mádenıeti tarıhy mýzeıine jáne «Kúltegin» eskertkishine bardy. Qonaqtar kóne túrki jazýy men órkenıetiniń tarıhyna arnalǵan biregeı materıaldarmen tanysty.
Buǵan deıin Qasym-Jomart Toqaev Laos Prezıdenti Thonglýn Sısýlıtti elorda áýejaıynan shyǵaryp salǵanyn jazǵanbyz.
