Laos Prezıdenti Qazaqstan Respýblıkasynyń Ulttyq mýzeıine bardy
ASTANA. KAZINFORM - Qazaqstanǵa alǵashqy resmı sapary aıasynda Laos Halyq Demokratııalyq Respýblıkasynyń Prezıdenti Thonglýn Sısýlıt Qazaqstan Respýblıkasynyń Ulttyq mýzeıine bardy, dep habarlaıdy QR mádenıet jáne aqparat mınıstrliginiń baspasóz qyzmeti.
Ulttyq mýzeıde Laos Prezıdentine Qazaqstannyń tarıhı-mádenı murasy, biregeı arheologııalyq jádigerler men ejelgi zergerlik buıymdar tanystyryldy.
Ekspozıtsııalar túrki halyqtarynyń materıaldyq jáne rýhanı mádenıetin, qazaq halqynyń salt-dástúri men turmys-tirshiligin qamtıdy. Mýzeıdiń qundy jádigerleri qatarynda Esik qorǵanynan tabylǵan Altyn adam, sondaı-aq Berel, Taldy-2, Taqsaı jáne Shilikti kóne qorymdarynan tabylǵan arheologııalyq muralar bar.
Ekskýrsııa sońynda Thonglýn Sısýlıt Ulttyq mýzeıdiń Qonaqtar kitabyna estelik jazba qaldyrdy.
Aıta keteıik, bir kún buryn eki memleket basshysynyń qatysýymen ótken kelissóz barysynda mádenı-gýmanıtarlyq baılanystardy damytýǵa aıryqsha mán berildi. Qasym-Jomart Toqaev pen Thonglýn Sısýlıt osy saladaǵy yntymaqtastyqty keńeıtý jáne týrızm baǵytyndaǵy baılanysty damytý máselelerin talqylady.
Aıta keteıik, Qasym-Jomart Toqaev Laos basshylyǵynyń elimizge alǵashqy saparyn mańyzdy qadam retinde baǵalady.
