Lańkestikte qaza tapqan serjanttyń anasy Oralda áskerı kontsertke shaqyryldy
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, osyndaı deńgeıde alǵash ret uıymdastyrylǵan gala kontserttiń qurmetti qonaqtary qatarynda «Batys» óńirlik qolbasshysynyń orynbasary, polkovnık Isataı Járdemov bastaǵan sardarlar, bıylǵy 5 maýsymda Aqtóbedegi lańkestik oqıǵalar kezinde erlikpen qaza tapqan kishi serjant Berikjan Qalıevtiń anasy Gúljan Erenova boldy.
«Bul merekelik shara áskerı qyzmetkerlerdiń shyǵarmashylyq baǵyttaǵy tabys-jetistikteriniń mol ekendikterin kórsetedi. Áskerı orkestr bólimdegi mádenı-kópshilik sharalardyń bárine qatysady. Áskerı ánderdiń sarbazdarǵa patrıottyq jáne estetıkalyq tárbıe berýde mańyzy zor», - dedi I.Járdemov.
Orkestrdiń dırıjeri, aǵa leıtenant Danııar Erǵosaevtyń aıtýynsha, ujymda 25 adam bolsa, olardyń bári de - kásibı mýzykanttar. Birqatarynyń konservatorııalyq bilimi bar, respýblıkalyq, halyqaralyq baıqaýlarda laýreat atanǵandar da joq emes. Merekelik baǵdarlamaǵa patrıottyq ándermen qatar sheteldik kompozıtorlardyń týyndylary da engizildi.
Ótken jyldar áýenderimen qatar estradalyq, folklorlyq kompozıtsııalarǵa kezek berilip, «Atameken» ánimen márege jetken kontsert qala turǵyndaryna jaqsy áser qaldyrdy.
Aıta keteıik, atalmysh orkestr 5517-áskerı bólim bazasynda 1995 jylǵy sáýirde quryldy. Alǵashqy dırıjeri Esbolat Abdýlov boldy. Shyǵarmashylyq ujym Batys Qazaqstan oblysyndaǵy birden-bir áskerı orkestr bolyp tabylady. Bıyl orkestr Qazan qalasynda ótken V halyqaralyq «Fanfary Kazanı» mýzykalyq úrmeli aspaptar orkestrleri festıvalinde Qazaqstan atynan óner kórsetip, dıplomant atandy. 
