Lańkestikke qarsy operatsııada jaraqattanǵan aqtóbelik polıtseıge páter beriledi
ASTANA. QazAqparat - Aqtóbe qalasynda lańkestikke qarsy operatsııa barysynda aýyr jaraqat alǵan polıtsııa qyzmetkeri Álibek Jetiǵarınge páter beriledi. Bul týraly QR ІІM baspasóz qyzmetinen málim etti, dep habarlaıdy QazAqparat tilshisi.
Vedomstvo málimetinshe, elimizdiń Іshki ister mınıstri Erlan Turǵymbaevtyń tapsyrmasymen Aqtóbe oblystyq polıtsııa departamentiniń basshysy Mahambet Ábisatov 2016 jyldyń maýsymynda Aqtóbe qalasynda júrgizilgen lańkestikke qarsy operatsııa barysynda aýyr jaraqat alyp, densaýlyǵyna baılanysty ishki ister organdarynan jumystan shyqqan Álibek Jetiǵarındy qabyldaǵan.
«Jetiǵarınge Aqtóbe qalasynan Polıtsııa departamentine ákimdik tarapy bekitken 2 bólmeli qyzmettik páter bólý, sonymen qatar jeńildikpen medıtsınalyq-saýyqtyrý ortalyǵynda saýyqtyrý kýrstarynan ótýge járdemdesý týraly sheshim qabyldandy», dep atap ótedi mınıstrlik.
