Lańkestik úshin jazany kúsheıtý zań jobasy Senatqa tapsyrylady
ASTANA. QazAqparat - QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat.
«Qarastyrylyp otyrǵan zań jobasynyń negizgi maqsaty ekstremızmge jáne lańkestikke, qarý-jaraq aınalymyne qarsy is-qımyl men kóshi-qondy retteý salalarynda zańnamany jetildirý bolyp tabylady. Zań jobasy azamattardy, qoǵamdy jáne memleketti qaterden qorǵaý deńgeıin arttyrýǵa baǵyttalǵan»,-dedi baıandama jasaǵan depýtat Janat Jarasov. Onyń sózine qaraǵanda, atalǵan zań jobasyn talqylaý barysynda úkimettik emes sektor, qoǵamdyq uıymdar men otandyq jáne sheteldik sarapshylardyń qatysýymen keńinen pikir almasýlar boldy. Osyǵan baılanysty ishki mıgranttardy tirkeý týraly másele qyzý talqyǵa tústi.
Zań jobasyn qabyldaýdaǵy maqsat - ekstremızmge jáne terrorızmge qarsy is-qımyl, qarý-jaraq aınalymy jáne kóshi-qondy retteý salasyndaǵy qoldanystaǵy zańnamany jetildirýge negizdelgen. Onda qarý-jaraq aınalymyn, ony saqtaý tártibin baqylaýdy kúsheıtý, onyń ishinde azamattyq, qyzmettik qarý jáne oq-dári aınalymy, sondaı-aq kúzet qyzmetin júzege asyrý salasynda jumys isteıtin kásipkerlik sýbektilerin memlekettik baqylaýdyń erekshe tártibin júzege asyrý eskerilgen. Budan bólek, ekstremızm men terrorızm úshin, onyń ishinde halyqaralyq lańkestik uıymdarǵa jáne sheteldik qarýly janjaldarǵa qatysqany úshin jazaǵa tartý sharalaryn kúsheıtý, lańkestikke yqpal etetin dinı toptar men birlestikterdiń qyzmetine tyıym salý qamtylǵan.
Sonymen qatar terrorızmge qarsy is-qımyl týraly zańnamany saqtamaǵany úshin, sondaı-aq qoldanylýy mindetti tehnıkalyq quraldardyń jaramsyzdyǵy úshin kúzet qurylymdarynyń jáne lańkestik jaǵynan osal nysandar ıeleriniń ákimshilik jaýapkershiligin engizý kózdelip otyr.
