Lańkestik úshin kámeletke tolmaǵandar azamattyqtan aıyrylmaıdy - Ádilet mınıstrligi

ASTANA. QazAqparat - Azamattyqtan aıyrý túrindegi jaza kámeletke tolmaǵandarǵa qoldanylmaıdy. Bul týraly «Qazaqstan Respýblıkasynyń keıbir zańnamalyq aktilerine olardy QR Konstıtýtsııasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» zań jobasy jóninde qoǵamdyq tyńdaý barysynda QR Ádilet mınıstrligi Zańnama departamentiniń dırektory Darhan Igembaev málim etti, dep habarlaıdy QazAqparat.

Zań jobasy aıasynda azamattyqtan aıyrý jazasy qaı qylmystarda kózdelgenine toqtalǵan ol, «Lańkestik áreketter boıynsha bizdiń Qylmystyq kodekste naqty tizbe kórsetilgen. Jalpy alǵanda, lańkestik qylmystar turǵysynda 14 qylmys quramy 10 baptyń ishinde eskerilgen. Al elimizge asa aýyr zııan keltirgeni úshin kózdeletin azamattyqtan aıyrý jazasy 11 bap boıynsha qarastyrylyp otyr. ıAǵnı, búgingi joba turǵysynda 21 bap boıynsha azamattyqtan aıyrý jazasy qamtylǵan»,-dedi.

Osy oraıda Igembaev azamattyqtan aıyrý qosymsha jaza retinde eskeriletinin atap ótti. Sonymen qatar bul jaza mindetti túrde sottyń qaraýyna sáıkes sheshiledi.

Munymen qosa, ol azamattyqtan aıyrý sharasy 18 jasqa deıin qylmys jasaǵandarǵa qoldanylmaıtyndyǵyn jetkizdi.

Departament basshysy azamattyǵynan aıyrylǵan adamnyń otbasy músheleri óz quqyqtarynda qandaı da bir shekteýlerge tap bolmaıtynyn aıtty.

Esterińizge sala keteıik, naýryz aıynyń aıaǵynda QR Ádilet mınıstrliginde Qazaqstanda qandaı qylmystar úshin azamattyqtan aıyrýy múmkin ekendigi túsindirilgen bolatyn.