Lańkestik qylmystarǵa ólim jazasyn engizý kerek - Astana sotynyń sýdıasy

ASTANA. QazAqparat - Lańkestik qylmystarǵa ólim jazasyn engizý kerek. Bul týraly búgin Ortalyq kommýnıkatsııalar qyzmetindegi baspasóz máslıhatynda Astana qalalyq sotynyń Qylmystyq ister apellıatsııalyq sot alqasynyń tóraǵasy Asqarjan Kenjeǵarın málim etti.

«Ólim jazasyna moratorıı jarııalanǵany belgili. Qazirgi kezde osy másele qoǵamda qozǵalyp jatyr jáne bul baǵytta qatań jazany engizýdi depýtattar sheshe alady. Al bizdiń pikirimizge toqtalatyn bolsaq, lańkestik aktiler jasalǵan qylmystarǵa ólim jazasyn engizgendi durys dep esepteımiz. Sebebi, qazirgi zamannyń talaby osyǵan ákelip otyr»,  - dedi A. Kenjeǵarın.

Óz kezeginde Astana qalalyq sotynyń sýdıasy Saıran Álimbaeva sońǵy bir aptada atalǵan másele qyzý talqylanyp jatqanyn atap ótti.

«Meniń oıymsha, isterdiń keıbir sanattary boıynsha ólim jazasyn engizý qajettigi bar. Naqtylap aıtqanda, lańkestikke qatysty osy jazany engizý kerek. Alaıda, bul máseleni tıisti talqylaýlardan keıin zańnamalyq organdar sheshedi», - dedi sýdıa.