Lańkestik kezinde ájethanaǵa tyǵylǵan áskerı qyzmetkerdiń biri raqymshylyqqa ilikti
AQTÓBE. QazAqparat - Aqtóbe qalasynda bolǵan lańkestik shabýyl kezinde №6655 áskerı bóliminiń qyzmetkerleri Qaınarbek Tastambekov pen Qaıyrǵalı Orazjanov ájethanaǵa tyǵylyp, keıin oqıǵa ornynan qashyp ketken bolatyn.
Ekeýi de sottaldy. Al búgin Qaınarbek Tastambekov raqymshylyqqa ilikti, dep habarlaıdy QazAqparat tilshisi.
5 maýsymdaǵy lańkestik oqıǵaǵa bıyl bir jyl tolady. Terrorıstik akt jasaǵandardyń bári ustalyp, sottalǵan soń, áskerı bólim qyzmetkerlerine jaza kesildi.
№6655 áskerı bóliminiń qos maıory Qaınarbek Tastambekov pen Qaıyrǵalı Orazjanovtyń qarýly shabýyl kezinde Áskerı jarǵyny buzyp, oqıǵa ornynan ketip qalǵany dáleldendi. Keıin ekeýi ustalyp, ústerinen is qozǵaldy .
Olar Qylmystyq kodekstiń «Ishki qyzmet atqarýdyń nemese garnızonda kezekshilikte bolýdyń jarǵylyq qaǵıdalaryn buzý» baby boıynsha aıypty dep tanylyp, Qaıyrǵalı Orazjanov 3 jyl 5 aıǵa, Qaınarbek Tastambekov 4 jyl 5 aıǵa bas bostandyǵynan aıyryldy. Ekeýi de jazasyn jalpy rejimdegi túzeý kolonııasynda ótep otyr.
Al búgin eks-áskerı qyzmetker Qaınarbek Tastambekovtyń Táýelsizdiktiń 25 jyldyǵyna oraı raqymshylyqqa ilikkeni belgili boldy. Qaınar Tastambekovtyń qorǵaýshysy Stanıslav Nıkıforovtyń aıtýynsha, sot sheshimimen onyń qorǵaýyndaǵy burynǵy áskerı qyzmetker jazanyń 3 jyl 8 aıyn bostandyqta júrip óteıdi.
«Tastambekov túzetý kolonııasynda otyr. Sot otyrysy onlaın-rejimde ótti. Sot sheshimimen «Raqymshylyq týraly» Zańǵa sáıkes Tastambekovtyń bas bostandyǵynan aıyrý jazasy bas bostandyǵyn shekteýge almastyryldy. Prokýratýra qarsy aryz túsirmese, Tastanbekov qalǵan 3 jyl 8 aıyn bostandyqta óteıdi»,- deıdi qorǵaýshy.
