Lańkestik qaýip-qater máselesinde Qazaqstanyń ishki jaǵdaıy turaqty - Á. Shaıahmetov
ASTANA. Jeltoqsannyń 8-i. QazAqparat /Qanat Mámetqazyuly/ - Lańkestik qaýip-qater máselesinde Qazaqstanyń ishki jaǵdaıy turaqty. Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda QR Ulttyq qaýipsizdik komıteti tóraǵasynyń mindetin atqarýshy Ádil Shaıahmetov osylaı málim etti,
dep habarlaıdy QazAqparat.
Jıyn barysynda senator Oralbaı Ábdikárimov UQK basshysynan elimizdegi terrorıstik qaýip jaǵdaıy, lańkestik qaterdi qaı jaqtan kútýge bolatyndyǵy týraly saýal qoıǵan bolatyn. «Qazaqstannyń ózi ishinde terrorızm máselesine qatysty qaýip-qaterler joq dep aıtýǵa bolady. Ondaı qaterler Qazaqstanmen kórshiles shetki memleketterde molyraq shoǵyrlanǵan, sondyqtan da búgingi basty qaýip osy baǵyttan kelý yqtımaldyǵy jıirek qarastyrylady. Atap aıtqanda, Ózbekstandaǵy rejimge, bılikke qarsy toptar, túrli baǵyttaǵy aǵymdar lańkestik áreketterge boı aldyrýy múmkindigi eskeriledi. Ekinshiden, Qazaqstanmen kórshiles Qytaıdan qýǵyndalǵan sondaı pıǵyldaǵy toptar men azamattar qazirgi aqparat boıynsha Aýǵanstan men Pákistan jerinde kóbirek shoǵyrlanǵan», dedi Á. Shaıahmetov.
Onyń aıtýynsha, UQK elimizdegi terrorıstik áreketterge qarsy sharalaryn, aldyn alý jumystaryn jiti baqylaýda ustap otyr. «Qazaqstanǵa ishinara kelip, áreket etýge tyrysqan emıssarlar, jat pıǵyldardaǵy aǵymdar ókilderi ustalyp, sotqa tartyldy.
